Del Monte, Alberto. Peire d'Alvernha, Liriche. Torino: Loescher-Chiantore, 1955.

Code: 323,002 Auteur: Peire d'Alvernha Genre: Vers Numero: III

Ab fina ioia comenssa

I	1	Ab fina ioia comenssa
		lo vers qui bels motz assona
		e de re no·i a faillenssa;
		mas no m’es bon qe l’apreigna
	5	tals cui mos chans non coveigna,
		q’ieu non vuoill avols chantaire,
		cel que tot chan desfaissona,
		mon doutz sonet torn’en bram.
II		D’amor ai la sovinenssa
	10	e·ls bels digz: ren plus no·m dona;
		mas per bona atendenssa
		esper c’alcus iois m’en veigna;
		·l segles voi c’om si capteigna
		segon que pot sempres faire
	15	q’en breu temps plus asazona
		q’a pro d’aisso don ac fam.
III		Bel semblan n’ai en parvenssa,
		que gen m’acuoill e·m razona,
		mas del plus no·m fai cossenssa,
	20	ni·s taing que tant aut mi ceigna
		ni tant rics iois m’endeveigna
		on coven us emperaire:
		pro fai car sol gen mi sona,
		ni car sofre q’ieu la am.
IV	25	Mout mi fai granda temenssa,
		car tant pauc si abandona:
		iois q’enaissi trop bistenssa
		mout mostra mal entresseigna.
		Si cum li plaira mi teigna,
	30	que tant no·m fai gran mal traire.
		Sei so que no l’encaisona:
		tant no·m ten en greu liam.
V		Ses pechat fis penedenssa
		et es tortz qui no·m perdona,
	35	et ieu fatz long’ entendenssa
		per tal perdon que no·m deigna;
		assatz cuig que mal m’en preigna,
		que perdutz es desperaire;
		per c’ai esperanssa bona:
	40	pel nostre Don mi reclam.
VI		Ben es fis de gran valenssa
		mos cors, s’aqest m’abarona
		per cui totz pretz creis e genssa,
		e sap pauc qui so m’enseigna
	45	que ia nuill’autra·m sosteigna:
		tant bella filla de maire,
		ni tant cum cels plou ni trona
		non ac tal el ling d’Azam.
VII		Als comtes mand en Proenssa
	50	lo vers e sai a Narbona,
		lai on pren ioi mantenenssa,
		segond aqels per cui reigna;
		e ieu trob sai qi·m reteigna,
		tal dompna don sui amaire:
	55	non ies a la lei gascona;
		segon las nostras amam.