Del Monte, Alberto. Peire d'Alvernha, Liriche. Torino: Loescher-Chiantore, 1955.

Code: 323,013 Auteur: Peire d'Alvernha Genre: Vers Numero: XVI

Cui bon vers agrad' a auzir

I	1	Cui bon vers agrad’ a auzir,
		de me lo cosselh qu’el escout
		aquest c’ara comens a dir;
		que pus li er sos cors assis
	5	en ben entendre·ls sos e·ls motz,
		ia non dira qu’el anc auzis
		melhors ditz trobatz lujnh nj prop.
II		Ges ben no fai az escarnir
		qui l’au, ans deu agradar mout,
	10	si tot l’outracujat albir,
		ab lor nesci feble fat ris
		tornon zo qu’es d’amon de sotz;
		e·l be vezem que s’enantis
		e l’esquerns resta de galop.
III	15	E per tal faj s’en bon gequir,
		qu’anc esquerns ni coratg’ es tout:
		si bruillet no sai vim florir,
		e par d’avol respeit iardis,
		can vei que la cima ni·l brotz
	20	non gieta frucha ni tequis,
		e l’intrador n’eisson tug clop.
IV		Era·s vol aire devezir:
		qui d’aver sai a gran comout
		be s’en deuria far servir;
	25	qu’en un mueg de marabotis
		no·us donaria doas notz,
		pos a la boca venra·l fis
		ni·l prestre secodra l’izop.
V		A quec deuria sovenir
	30	que non agues corag’ estout
		del be don nos devem iauzir,
		qu’en pauc d’ora es hom conquis;
		e can ven als deriers sanglotz,
		no li vai honcles ni cozis,
	35	ni metges ab son issarop.
VI		Ben deuria pensar morir
		qui dreitz huils garda sus lo vout:
		cossi Dieus per nos a guerir
		receup mort, e pos mort aucis
	40	celuj qui per nos venc en crotz;
		tug morrem, c’avers non gueris
		negun al temps plus que fetz Iop.
VII		Mes son intrat en lonc cossir
		cels qui son al derier escout
	45	c’a la mort no·s pot escremir
		coms ni reis ni ducs ni marquis,
		e, s’enantz no·s nedeia totz
		que la mortz li serre lo vis,
		be si pot, si·s vol, trigar trop.
VIII	50	Totz jorns vos poiria legir;
		mas preguem cel qu’es caps e fis
		que·ns garde del enfemal potz
		e que·ns met’el sieu paradis
		lay on mes Ysach e Iacop.