Appel, Carl. Das Leben und die Lieder des trobadors Peire Rogier. Berlin: Druck und Verlag von G. Reimer, 1882.

Code: 356,004 Auteur: Peire Rogier Genre: Vers Numero: 6

Ges non puesc en bon uers fallir

I	1	Ges non puesc en bon uers fallir
		nulh’ hora que de midons chan ;
		cossi poiri’ieu ren mal dir ?
		qu’om non es tan mal essenhatz,
	5	si parl’ab lieys un mot o dos,
		que totz uilas non torn cortes ;
		per que sapchatz be que uers es,
		que·l ben qu’ieu dic tot ai de liey.
II		De ren als no pes ni cossir
	10	ni ai dezirier ni talan,
		mas de lieys quo·l pogues seruir
		e far tot quant l’es bon ni·l platz,
		qu’ieu non cre qu’ieu anc per als fos
		mais per lieys far so que·l plagues,
	15	que be say qu’onors m’es e bes
		tot quan fas per amor de liey.
III		Ben puesc los autres escarnir,
		qu’aissi·m suy sauputz trair’enan
		que·l mielhs del mon saupi chauzir ;
	20	ieu o dic e sai qu’es uertatz ;
		ben leu manz n’i aura gelos,
		que diran : menz e non es res ;
		no m’en cal ni d’aco no m’es,
		qu’ieu say ben cossi es de liey.
IV	25	Greus m’es lo mals tragz a sufrir
		e·l dolors, qu’ay de lieys tan gran,
		don lo cors no·m pot reuenir ;
		pero no·m platz autr’amistatz,
		ni mais iois no m’es dous ni bos,
	30	ni no uuelh que·m sia promes,
		que, s’ieu n’auia cent conques,
		ren no·ls pretz mais aquels de liey.
V		Bona dompna, souen sospir
		e trac gran pena e gran afan
	35	per uos, cuy am mout e dezir ;
		e car no·us uey, non es mos graz ;
		e si be m’estau luenh de uos,
		lo cor e·l sen uos ai trames,
		si qu’aissi no suy on tu·m ues,
	40	. . . . . . . . . . . .
VI		Ailas ! — que plangz ? — ia tem morir. —
		que as ? — am. — e trop ? — ieu hoc, tan
		que·n muer. — mors ? — oc. — non potz guerir ? —
		ieu no. — e cum ? — tan suy iratz. —
	45	de que ? — de lieys, don sui aissos. —
		sofre. — no·m ual. — clama·l merces. —
		si·m fatz. — no·y as pro ? — pauc. — no·t pes,
		si’n tras mal. — no ? — qu’o fas de liey.
VII		Cosselh n’ai. — qual ? — uuelh m’en partir. —
	50	no far ! — si faray. — quers ton dan. —
		que·n puesc als ? — uols t’en ben iauzir ? —
		oc mout. — crei mi. — era diguatz. —
		sias humils, francs, larcx e pros. —
		si·m fai mal ? — sufr’en patz. — suy pres ? —
	55	tu oc, s’amar uols ; mas si·m cres,
		aissi·t poiras iauzir de liey.
VIII		Mon Tort-n’auetz mant, s’a lieys platz,
		qu’aprenda lo uers, s’il es bos ;
		e puois uuelh que sia trames
	60	mon Dreit-n’auetz lai en Saues,
		dieus salu e gart lo cors de liey.