Appel, Carl. Das Leben und die Lieder des trobadors Peire Rogier. Berlin: Druck und Verlag von G. Reimer, 1882.

Code: 070,011 Auteur: Bernart de Ventadorn Genre: Canso Numero: III

Belh Monruelh, aisselh que·s part de uos

I	1	Belh Monruelh, aisselh que·s part de uos
		e non plora, ges non es doloiros,
		ni no sembla sia corals amicx ;
		francx e gentils e belhs e larcx e pros
	5	es Monruelhs, e uos dels companhos
		plus que negus de midons, na Helis.
II		Al chan d’auzel comensa ma chanzos,
		quant aug chantar las guantas e·ls aigros
		e pels cortils uey uerdeyar los lis,
	10	la blaua flor, que nais entre·ls boissos,
		e·l riu son clar desobre los sablos,
		lai on s’espan la blanca flors de lis.
III		Lonjamens ai estat desamoros,
		de bon’ amor paupres e sofrachos,
	15	per la colpa d’una fals’amayris,
		qu’a fatz uas mi enjans e mespreyzos,
		don ieu l’ai fag quaranta uetz perdos ;
		no·m laissera, tro que m’agues aucis.
IV		D’aquestas mas fon culhitz lo bastos,
	20	ab que m’aucis la belazer qu’anc fos ;
		tan m’atendiey en lieis, que la seruis,
		que lauzengier e sospirs anguoissos
		e loncx dezirs e petitz guazardos
		m’an fag estar faiditz del sieu pays.
V	25	Ben pauc ama drutz, que non es gelos,
		e pauc ama qui non es aziros,
		e pauc ama qui non enfolletis,
		e pauc ama qui non fay trassios ;
		mais ual d’amor, quant hom n’es enueios,
	30	uns bons plorars, no fan quatorze ris.
VI		Quant ieu li quier merce de genolhos,
		ylh m’encolpa e·m troba ocaizos,
		e l’aigua·m cor denan per miey lo uis ;
		et ela·m fai un esguart amoros,
	35	et yeu li baiss la boqu’ e·ls huelhs amdos, —
		adoncx me ue us ioys de paradis.
VII		Mon Joy coman al uerai glorios ;
		l’onors, que·m fetz sotz lo pin en l’erbos
		en aquel temps, quant elha me conquis,
	40	me fai uiure e me ten delechos,
		qu’ieu fora mortz, s’aquilh honors no fos
		e·l bos respiegz, que mi reuerdezis.
VIII		Aquest chantars pogra ben esser bos,
		qu’en Monruelh comensa ma chansos
		et en mon ioi, de cui ieu sui, fenis.