Loporcaro, Michele. Due poesie di Guilhem de Saint Gregori (BdT. 233.2 e 233.3). "Medioevo Romanzo", XV (1990), pp. 17-60.

Code: 233,003 Auteur: Guillem de Saint Gregori Genre: Canso Numero: II

Nueyt e iorn ai dos mals senhors

I	1	Nueyt e iorn ai dos mals senhors
		que·m fan tort, e no·m n’aus clamar
		ni m’aus d’elhs partir ni lunhar;
		aisso es ma dompna ez Amors,
	5	a cuy per aisso platz mos dans
		quar lur servirs m’es cars e bos
		a quascun iorn mais per un dos;
		e sai qu’aquest forfagz es grans,
		mas per lo rey Omer de chans
	10	fon faitz de maior tort perdos.
II		Si fos vius Berenguiers de Tors,
		non saubra tan gent enchantar
		cum silh que·m fai velhan somnhar
		quan pens de lieys, q’una doussors
	15	me nais al cor, e si mil ans
		durav’ adoncx selha sazos,
		no·m semblaria us breus iorns fos,
		que·l sieu gen cors e·ls huelhs truans
		vey e remir tot per semblans,
	20	tro que me mou qualsqu’enujos.
III		E membre·l donc de mas clamors
		mi dons, cuy suy ses tot falsar;
		qu’oblit son pretz mens de laissar,
		e membre·l de mas greus dolors,
	25	qu’oblit son paratge qu’es grans,
		e membre·l quo l’am a rescos,
		ez oblit sas gayas faissos,
		e membre·l cum suy malanans,
		ez oblit totz sos braus talans,
	30	e membre·l que·m fassa ioyos.
IV		E no·m fezes plus de socors
		qu’ilh volgra qu’ieu li degues far,
		s’illa·m volgues tam ben amar
		quon yeu l’am, ni·l fos tan d’onors,
	35	ez yeu plus qu’ilh ves mi dostans
		fos vas lieys braus ez ergulhos;
		e fora mezura e razos,
		pueys saubra sos gays cors prezans
		qual mal tray dezamatz amans,
	40	pus non cre mi ni mas chansons.
V		Qu’ilh ri e chanta dels mieus plors
		e pauza e dorm del mieu vellar,
		ez yeu·m tenc vil, ela·s ten car
		e mos trebalhs es li legors,
	45	e li es soiorns mos afans.
		Yeu prec la ab digz amoros,
		ela·s defen ab braus respos,
		ylh s’orguelh’, ye·l suy merceyans,
		ylha·m destarza e yeu l’enans
	50	som pretz en comtan ez ab sos.
VI		Belha dompna cuend’ e prezans,
		valla·m merces qu’anc fis amans
		non amet tant qu’amatz no fos.