Ricketts, Peter T. Les poésies de Guilhem de Montanhagol, troubadour provençal du XIIIe siècle. Toronto: Pontifical Institute of Mediaeval Studies, 1964.

Code: 225,014=437,030 Auteur: Guilhem de Montanhagol , Sordel Genre: Tenso (Partimen) Numero: III

Senh'En Sordel, mandamen

I	1	Senh’En Sordel, mandamen
		ai del ric comte plasen
		proensal qu’a pretz valen
		que us deman si·us plairia
	5	mais, ni·us parria plus gen
		que saubes vostr’amia
		vostre cor, si com l’amatz,
		o que vos lo sieu sapchatz,
		si·us am’o etz galiatz.
	10	Cauzetz a vostra guia,
		qu’ieu sai be qual penriatz,
		qui no·us en reprendia.
II		Montanhagol, per un cen
		me seria plus plazen
	15	que cilh per qu’ieu muer viven,
		saubes be, on qu’ilh sia,
		mon cor, cuy ten en turmen,
		que s’ieu lo sieu sabia.
		Quar si·lh mostrava vertatz
	20	cum suy per lieys turmentatz,
		penria li·n piatatz,
		o totz sos cors seria
		durs cum peira, freitz cum glatz,
		tan que merce n’auria.
III	25	Sordel, mais val veramen,
		sapchatz lo cor e l talen
		de lieys qu’amatz finamen,
		si·us am’o si·us gualia.
		Quar soven, sotz belh parven
	30	se rescon gran falsia;
		e si·us trobatz enguanatz,
		trop semblaretz forsenatz,
		si pueys amatz desamatz,
		ni seguetz la follia,
	35	quar, pueys qu’hom ve sas foudatz,
		fols es si no·s chastia.
IV		Montanhagol, yeu no pren
		per lieys lunh galiamen
		cuy am e sierf lialmen,
	40	si bel plai que m’aucia,
		per que mon fin cor, qu’ieu·l ren,
		vuelh sapch’, on qu’ilh estia,
		quar leu m’er en joy tornatz
		le dols don suy trebalhatz,
	45	pus sabra sos cors prezatz
		cum languisc nueg e dia,
		ni qu’en lieys cuy suy donatz
		es ma mortz e ma via.
V		Sordel, yeu tenc a non sen
	50	qui en autruy chauzimen
		met son fach, qu’adrechamen
		per si faire poiria;
		per qu’ieu tenc a mais valen
		que saubessetz la via
	55	del cor e totz sos pessatz
		de la bella don chantatz,
		que si·lh sap cum la cujatz
		enganar, si·us crezia.
		S’es aitals cum la lauzatz,
	60	foll’er s’en vos se fia.
VI		Pus fi de mi eys prezen,
		Montanhagol, franchamen
		a lieys que m’a ses conten,
		no fuy en ma baylia,
	65	enans ai estat languen
		fis en sa senhoria;
		don s’era ben acertatz
		sos cors don mieus es greujatz,
		leu seria coronatz
	70	del joy qu’ueymais deuria
		venir, don suy totz secatz
		d’envey’e de feunia.
VII		Sordel, le ricx coms prezatz,
		on es fis sabers triatz,
	75	proensals, jutje, si·l platz,
		esta nostra partia,
		qu’ieu enten qu’hom vius ni natz
		mielhs non la jutjaria.
VIII		Quar mos senher es lauzatz,
	80	pauc duptans e pro duptatz
		per cels cuy es desamatz,
		Montanhagols, li sia
		li jutgamens autreyatz,
		tortz o dregz, quais que sia.