Ricketts, Peter T. Les poésies de Guilhem de Montanhagol, troubadour provençal du XIIIe siècle. Toronto: Pontifical Institute of Mediaeval Studies, 1964.

Code: 225,007 Auteur: Guilhem de Montanhagol Genre: Canso Numero: VIII

Non an tan dig li primier trobador

I	1	Non an tan dig li primier trobador
		ni fag d’amor,
		lai el temps qu’era guays,
		qu’enquera nos no fassam apres lor
	5	chans de valor,
		nous, plazens e verais.
		Quar dir pot hom so qu’estat dig no sia,
		qu’estiers non es trobaires bos ni fis
		tro fai sos chans guays, nous e gent assis,
	10	ab noels digz de nova maestria.
II		Mas en chantan dizo·l comensador
		tant en amor
		que·l nous dirs torn’a fays.
		Pero nou es, quan dizo li doctor
	15	so que alhor
		chantan no dis hom mais,
		e nou, qui ditz so qu’auzit non avia,
		e nou, qu’ieu dic razo qu’om mais no dis,
		qu’amors m’a dat saber, qu’aissi·m noyris,
	20	que s’om trobat non agues, trobaria.
III		Be·m platz qu’ieu chan, quan pes la gran honor
		que·m ven d’amor,
		e·n fassa ricx essays,
		quar tals recep mon chan e ma lauzor
	25	que a la flor
		de la beutat que nays.
		Pero be·us dic que mielhs creire deuria
		que sa beutatz desus del cel partis,
		que tan sembla obra de paradis
	30	qu’a penas par terrenals sa conhdia.
IV		D’una re fan donas trop gran follor
		quar lor amor
		menan ab tan loncx plays,
		que quascuna, pus ve son amador
	35	fi ses error,
		falh si l’alonga mais ;
		quar hom no viu tan quan faire solia,
		doncx convengra que·l mals costums n’issis
		del trop tarzar, qu’ieu no cre qu’om moris
	40	tan leu com fai, si d’amor si jauzia.
V		Trop fai son dan dona que·s do ricor,
		quant hom d’amor
		la comet, ni·s n’irays,
		que plus bel li es que sofran preyador
	45	que si d’alhor
		era·l peccatz savais.
		Que tais n’i a, quays qu’om non o creiria,
		ab que fos dig qu’en fan assais fraydis,
		per qu’amors falh entr’elas e vilsis,
	50	quar tenon mal en car lor carestia.
VI		Ieu am e blan dona on ges non cor
		enjans d’amor,
		per que no m’en biays,
		ni o dey far, qu’om la te per melhor
	55	e per gensor,
		per qu’amors m’i atrays ;
		qu’amans es fols quant en bon loc non tria,
		quar qui ama vilmen se eis aunis ;
		qu’a las melhors deu hom esser aclis,
	60	don nais merces, valors e cortezia.
VII		N’Esclarmonda, qui etz vos e Na Guia,
		quascus dels noms d’ambas o devezis:
		que quecx dels noms es tan cars e tan fis,
		qu’om que·l mentau pueys non pren mal lo dia.