Boutière, Jean. Peire Bremon lo Tort. "Romania", 54 (1928), pp. 427-452.

Code: 331,001 Auteur: Peire Bremon lo Tort Genre: Canso Numero: I

En abril, quant vei verdejar

I	1	En abril, quant vei verdejar
		los pratz vertz e·ls vergiers florir
		e vei las aigas esclarcir
		et aug los auselletz chantar,
	5	l’odors de l’erba floria
		e·l douz chanz que l’auzels cria
		me fai mon joi renovellar.
II		En cest temps soli’eu pensar
		consi·m pogues d’amor jauzir,
	10	ab cavalcar et ab garnir
		et ab servir et ab donar :
		qui aquestz mestiers auria,
		per els es amors jauzia
		e deu la’n hom mielz conquistar.
III	15	Eu chant, qui deuria plorar,
		qu’ira d’amor me fai languir ;
		ab chantar me cuich esbaudir ;
		et anc mais non auzi parlar
		qu’om chant qui plorar deuria ;
	20	pero no·m desesper mia,
		qu’ancar aurai luoc de chantar.
IV		No·m dei del tot desesperar
		qu’eu enquar mi dons non remir,
		car aicel qui la·m fetz gequir
	25	a ben poder del recobrar ;
		e s’ieu er’en sa baillia,
		si mai tornav’ en Soria,
		ja Dieus no m’en laisses tornar.
V		Ben gent me sap lo cor emblar,
	30	quan pris comjat de chai venir,
		que non es jornz qu’eu non sospir
		per un bel semblan que·il vi far ;
		qu’ella·m dis, tuta marria :
		« Que fara la vostr’ amia.
	35	bels amics ? per que·m vols laissar ? »
VI		Ben se dec Deus meravillar
		car anc me poc de lei partir,
		e dec m’o ben en grat tenir
		quant per lui la volgui laissar ;
	40	qu’el sap ben, s’eu la perdia,
		que ja mais joi non auria,
		ni el non la·m pogr’ esmendar.
VII		Chanzos, tu·t n’iras outra mar,
		e, per Deu, vai a mi donz dir
	45	qu’en grant dolor et en conssir
		me fai la nuoich e·l jorn esta.
		Di·m a’N Guillem Longespia,
		bona chanzos, qu’el li dia
		e que·i an per lei confortar.
VIII	50	Qe Filippe de Monreal
		me ten pres en sa bailia,
		et am tan sa compagnia
		que sens lui no m’en puesc tornar.