Boutière, Jean. Peire Bremon lo Tort. "Romania", 54 (1928), pp. 427-452.

Code: 331,002 Auteur: Peire Bremon lo Tort Genre: Canso Numero: II

Mei oill an gran manentia

I	1	Mei oill an gran manentia
		aguda en lor baillia ;
		ara·m pesa car viurei,
		que ja mais joi non aurei ;
	5	ar me·n voill del tot giquir
		e no·l poirai mais cobrar,
		e laisserai mi morir,
		c’om ses joi non deu durar.
II		Qu’era roman en Suria
	10	mos jois et eu tenc ma via
		en las terras on nasquei :
		ja mais mi donz non veirei ;
		gran mal mi fan li sospir
		que per lei m’aven a far,
	15	que la nuoch non posc dormir
		e·l jorn m’aven a veillar.
III		Aquesta domna n’es mia,
		ne s’eschai ges qu’il o sia,
		qu’anc s’amor no·ill demandei,
	20	ni ja no m’o pensarei ;
		mas, s’ieu la pogues servir,
		ja no me·n fera prejar,
		et eu tem en tan faillir
		c’al res no·ill aus demandar.
IV	25	De sen e de cortesia
		a tota la seingnoria
		cesta domna cui me dei
		lo premier jorn que’il parlei ;
		e sembla·m, quan la remir,
	30	qu’el mon non aia sa par,
		que tot lo be c’om pot dir
		porri’om del seu doblar.
V		Dieus, com gran merce faria
		us sieus garsos, si·m seguia
	35	per las terras on irei,
		que·m parles tot jorn de lei :
		quant il s’iria jazir,
		eu seri’ al sieu colgar,
		e non poiria soffrir
	40	c’autr’om l’anes descausar.
VI		Era·m seit Dieus en aia,
		e·m torn en lai dreita via
		a ma domna cui lachei ;
		non sai s’ieu la cobrarei ;
	45	qan de leis mi vench al partir,
		anch comgad no·m volc donar :
		Dieus la me lais convertir,
		qe i pusca merse trobar.