Coulet, Jules. Le troubadour Guilhem Montanhagol. Toulouse: Imprimerie et Librairie Édouard Privat, 1898.

Code: 225,004 Auteur: Guilhem de Montanhagol Genre: Sirventes Numero: IV

Del tot vey remaner valor

I	1	Del tot vey remaner valor,
		Qu'om no·s n'entremet sai ni lai,
		Ni non penson de nulh ben sai,
		Ni an lur cor mas en laor.
	5	E meron mal clerc e prezicador,
		Quar devedon so qu'az els no·s cove,
		Que om per pretz no do ni fassa be.
		E om que pretz ni do met en soan,
		Ges de bon loc no·lh mou, al mieu semblan.
II	10	Quar Dieus vol pretz e vol lauzor;
		E Dieus fo vers om, qu'ieu o sai,
		E om que vas Dieu res desfai,
		E Dieus li a fag aitan d'onor
		Qu'al sieu semblan l'a fag ric e major
	15	E pres de si mais de neguna re,
		Doncx ben es fols totz om que car no·s te.
		E que fassa en aquest segle tan
		Que sai e lai n'aya grat, on que·s n'an.
III		Ar se son faitz enqueredor
	20	E jutjon aissi com lur plai.
		Pero l'enquerre no·m desplai,
		Anz me plai que casson error
		E qu'ab bels digz plazentiers, ses yror,
		Torno·ls erratz desviatz en la fe,
	25	E qui·s penet, que truep bona merce,
		E enaissi menon dreg lo gazan
		Que tortz ni dregz no perdan so que y an.
IV		Enquer dizon mais de folor
		Qu'aurfres a dompnas non s'eschai.
	30	Pero si dompna piegz no fai,
		Ni·n leva erguelh ni ricor,
		Per gent tener no pert Dieu ni s'amor.
		Ni ja nulhs om, s'il estiers be·s capte,
		Per gent tener ab Dieu no·s dezave;
	35	Ni ja per draps negres ni per floc blan
		No conquerran ilh Dieu, s'alre no y fan.
V		Tug laisson per Nostre Senhor
		Nostre clerc lo segle savai,
		E no pessan mas quan de lai.
	40	Aissi·ls guart Dieus de dezonor
		Cum e·ls non an ni erguelh ni ricor,
		Ni cobeytatz no·ls enguana ni·ls te,
		Ni no volon re de so bel qu'om ve:
		Res no volon, pero ab tot s'en van,
	45	Pueys prezon pauc qui ques i aja dan.
VI		Sirventes, vay al pro comte dese
		De Toloza; membre·lh que fag li an
		E guart se d'els d'esta ora enan.