Coulet, Jules. Le troubadour Guilhem Montanhagol. Toulouse: Imprimerie et Librairie Édouard Privat, 1898.

Code: 225,005 Auteur: Guilhem de Montanhagol Genre: Sirventes Numero: V

Ges, per malvastat qu'er veya

I	1	Ges, per malvastat qu'er veya
		Dels ricx cuy valors non agensa,
		No·m ven en cor qu'ieu·m recreya
		De joy ni de bella parvensa,
	5	Sitot lur es valors amara,
		Tan que quecx la dezampara
		Per desconoyssensa.
II		De re mos cors no s'esfreya
		Mas quar so nom camget Proensa,
	10	Que falhi tan que·s desleya;
		Per qu'ueymais aura nom Falhensa,
		Quar leyal senhori' e cara
		A camjada per avara,
		Don pert sa valensa.
III	15	Be volri' agues enveya
		Le reys qu'ab Frances mogues tensa,
		Qu'el vens e pren e pesseya
		Turcx, cui Frances non an guirensa.
		E qui lurs vensedors vens ara,
	20	Semblans es, qui ben o guara,
		Que·ls vencutz leu vensa.
IV		S'eras lo reys non desreya
		D'Aragon, trop fai d'estinensa,
		E·l coms cui Tolza s'autreya,
	25	Qu'ueymai non an pus revinensa;
		Quar si l'us l'autre non ampara,
		Major saut penran encara
		Frances, ses temensa.
V		A! que ja non er peleya!
	30	Ni de lun om non es s'entensa
		Qu'us fassa res que far deya,
		Tan torna pretz en nonchalensa!
		Quar qui pren anta en sa cara,
		Si no·s venj' o no s'esclara,
	35	Trop fai de sufrensa.
VI		En Guilhem de Moncad' ampara
		Pretz, on mans ricx s'en despara,
		Don fai gran valensa.
VII		N'Esquilleta, son bon pretz gara
	40	N'Esclarmonda fin' e cara,
		Per qu'als pros agensa.