Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Code: 248,086 Auteur: Guiraut Riquier Genre: Vers Numero: XXIV

Cristïan son per Jhesu Crist nomnat

		LO XXV VERS D'EN GR. RIQUIER, FACH EN L'AN MCCLXXXX, EN ABRIL.
I		Cristïan son per Jhesu Crist nomnat
		lo filh de Dieu; qu'elh venc mostrar la via
		de salvamen, qu'om salvar no·s podia
		tro qu'elh obret drechura e vertat,
	5	e mandet patz, lialtat ez amor,
		e karitat e merce ab valensa
		d'un ad autre, humiltat, crezensa,
		don son mundat, ab esper, peccador.
II		Mas tant son lunh de mundar peccador,
	10	qu'a penas fai baratz ad un temensa,
		ni sap que s'es razos ni conoyssensa,
		ni dreitz ni patz, ni enten en amor;
		ans es quascus tant sosmes a peccat,
		qu'a penas sent son dan, ni·l ve ni·l tria,
	15	ni conoys ver, merce ni cortezia,
		qu'ans vens lo pus poders ab voluntat.
III		A penas es poders ses voluntat,
		ez a voler falh poders nueg e dia,
		qu'om en voler a penas se fadia,
	20	e non poders te voler embargat.
		Donc quascus gar quant y fa per amor
		de Dieu el mun, e quon salvars l'agensa,
		e quo·l tanh noms de Crist, que pres naissensa
		e mort per selhs que·l son fin amador.
IV	25	Mais son l'amat que no son l'amador
		de Dieu, e par, tant nos fa gran sufrensa
		quar no·ns punis segon nostra falhensa,
		que dreitz fora, mas sofre per amor;
		per qu'em lo pus el sufrir enganat,
	30	quar no laissam del tot nostra folhia
		que conoyssem, e temors no·ns chastia
		del jorn on tuch serem per dreg jutjat.
V		Crist filhs de Dieu, per qui serem jutjat,
		que per salut del poble que·s perdia
	35	nasquist del cors de la verge Maria,
		e resceubist greu mort per karitat,
		e pueys, ressors, confortiest per amor
		tos discipols, Senher, dona·ns sabensa
		que·n la via vera, per penedensa
	40	de nostres jorns, finem en ta lauzor.
VI		No pot esser vera patz ses amor,
		quar d'amor ven lialtatz, conoyssensa
		e drechura, patz e perdos d'ofensa;
		mas fin'amors el mon gaire no cor.
VII	45	A la Verge, digna maire d'amor,
		de qu'ieu ai fag Bel Deport, si l'agensa,
		coman mi eys, e no·m gar ma falhensa,
		per karitat prec per me·l Salvador.
VIII		Maires de Crist, fai nos de precx valensa,
	50	si·t plai, ab luy, qu'elh nos guid'en s'amor.