Boutière, Jean. Les poésies du troubadour Peire Bremon Ricas Novas. Toulouse - Paris: Édouard Privat - Henri Didier, 1930.

Code: 330,016 Auteur: Peire Bremon Ricas Novas Genre: Canso Numero: X

Si·m ten Amors     ab douz plazer jauzen

I	1	Si·m ten Amors     ab douz plazer jauzen,
		qe dinz mon cor port de fin joi la clau,
		que·l cautz ni·l freigz, ni·l braus temps ni·l soau
		no·m nozon ren ; tan mi vai ben e gen
	5	qe tot m’es plazen,
		e mos enemics
		non tem, tan sui rics
		de joi e d’amor
		en qe m’alegor ;
	10	c’aitals ricors mi soste
		et autra no·m tenc en re.
II		C’aitals ricors     m’abeillis, qan soven
		penz del thesaur de cui eu tieing la clau,
		en tal plazer, si tut m’estau suau,
	15	qe re mas joi dedinz mon cor non sen,
		si·m vai dolzamen ;
		e gelos enics
		no·m pot far destrics
		a jauzir l’onor
	20	en qe m’alegor ;
		car ai triat, per ma fe,
		miels de meilor e de be.
III		Tot lo dreig cors     sai d’amor finamen,
		aisi con sel qi d’Amor ten la clau ;
	25	per que chauzi vos, domna tot soau,
		per la meillor e per la plus plazen,
		que non i a conten ;
		ni anc fals prezics
		d’omes moys ni trics
	30	jorn no·m fes paor ;
		per q’ieu m’alegor
		de tot, qar pro no lur te
		fals mentirs, ni notz a me.
IV		Vostra valors     estai seguramen,
	35	qe nuls laire no·n pot far contra-clau ;
		et a mi vai sobreben e soau,
		qar la gardatz ab mesur’e ab sen ;
		tam ben qe no·i pren
		crims de crois mendics ;
	40	ni negus afics
		de lauzenjador
		no·m tol ma legor,
		ne l’onrat joi qe·m mante,
		domna, en vostra merce.
V	45	Be·us dic lauzor     verai’adrechamen,
		domna plazen, car vos tenetz la clau
		d’onrat pretz fin e car, ab un suau
		sobregentil segur captenemen ;
		per qe·l conoissen,
	50	de qu’eu sui amics,
		dizori q’etz abrics
		de vera valor ;
		e prenc ma legor
		car ditz, qi·us au ne vos ve,
	55	qe mais ni meinz no·us cove.
VI		Domn’ai e segnor
		e joi e legor,
		Sordel, per qe·m vai tam be
		q’emveja no·us tenc de re.
VII	60	Sordel, a vos et a me
		vai d’amor si con cove.