Boutière, Jean. Les poésies du troubadour Peire Bremon Ricas Novas. Toulouse - Paris: Édouard Privat - Henri Didier, 1930.

Code: 330,012 Auteur: Peire Bremon Ricas Novas Genre: Canso Numero: XIII

Pois lo bels temps renovella

I	1	Pois lo bels temps renovella
		e fai de novel renverdir
		tot qant es, voilh de novel dir
		c’uns novels voler[s] m’apella
	5	e·m di qe chant novellamen
		d’un gen cors novel avinen,
		a cui me sui de novel fer[m] fermaz,
		qar sui per lui de nou renovellaz.
II		Gen renovellet la bella
	10	mon gen cor al gent acuillir
		q·em fes gen, per q’ades consir
		qon gen fins prez la capdella
		e com ab gen acuillimen
		m’a del cors mon fin cor trait gen ;
	15	sens brui refui gen, qe, si·m plac, no·m plaz
		desdui d’autrui, si·m lia ab gen laz.
III		Tant l’am qe·l cors me travelha
		Amors e·m fai lo cor languir.
		E si·m vol far aman morir
	20	Amors, q’enaisi·m martella,
		far o pot ; tant am fermamen
		lei, qe aman me et mon sen
		destrui, q’abdui l’aman ples traenz traz ;
		q’ab glui m’estui, tan l’am ab gran senz graz.
IV	25	Grat li·n sai qar es isnella
		e sap grat dels pros retenir
		e·s fa’gradan son prez grasir,
		e grat, qar aissi·m cenbella ;
		qar, s’ab lei trob rnerce grasen,
	30	grat n’aura, e merces eissamen
		sen trui s’endui leis a grat, on jois jatz,
		per cui relui ab grat rics prez presatz.
V		Prez fins fai Audiart valent
		del Bauz, il et el’eissamen,
	35	don cui sens trui cerz prez s’es encertatz
		en lui per cui viu prez d’onor onraz.