Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Code: 155,005 Auteur: Folquet de Marselha Genre: Canso Numero: I

Ben an mort mi e lor

		Versione α
I		Ben an mort mi e lor
		miei huoill galiador,
		per que·s taing c’ab els plor
		pois ill so an merit,
	5	qu’en tal dompn’an chausit
		don an faich faillimen,
		e qui trop poja bas dissen;
		pero en sa merce mi ren,
		qu’ieu non cre jes que merces aus faillir
	10	lai on Dieus volc totz autres bes aizir.
II		E si conosc d’Amor
		que mos dans l’a sabor,
		que so don ai largor
		mi fai prezar petit,
	15	e poignar ad estrit
		en tal que si·m defen:
		so que m’encaussa vau fugen
		e so que·m fuig ieu vauc seguen;
		aissi non sai cossi·m posca garir,
	20	qu’ensems non puosc encaussar e fugir.
III		Ar aujatz gran follor:
		qu’arditz sui per paor,
		mas tant tem la dolor
		d’amor que m’a sazit
	25	qu’aisso·m fai plus ardit
		de mostrar mon talen
		a lieis que·m fai veillar dormen;
		doncs, ai per paor ardimen,
		aissi cum cel qu’estiers non pot gandir
	30	que vai totz sols entre cinc cens ferir.
IV		Pros dompna cui ador,
		restauratz en valor
		mi e vostra lauzor,
		c’amdui n’em aflebit
	35	car metetz en oblit
		mi que·us am finamen;
		que cill c’o sabon van dizen
		que mal servir fai mainta gen,
		et eu que·us am tant que d’als non cossir
	40	pert mi e vos: gardatz si·m dei marrir.
V		E ja ogan per flor
		no·m viratz chantador,
		mas prec de mon seignor,
		lo bon rei, cui Dieus guit,
	45	d'Aragon, m’an partit
		d’ira e de marrimen,
		per qu’ieu chan tot forsadamen;
		mas al sieu plazen mandamen
		no devon ges sei amic contradir,
	50	qu’alz enemics vei que·s fai obezir.
VI		Sai a la dolor de la den
		vir la leng’, a lieis cui mi ren,
		et er merces s’ill me deigna acuillir,
		qu’e maint bon luoc fatz son ric pretz auzir.
[VI'	[51']	[Marsan, vas Trez vai t’en corren,
	[52']	lai a·N Raimon Berengier cui dezir
	[53']	e car li er bo fatz li mon chan auzir.]
VII	55	Bels N’Azimans, Dieus mi gart de faillir
		vas lieis que faill vas me, s’o auses dir.
		Versione β
I		Ben an mort mi e lor
		miei huelh galiador,
		per que·m plaz c’ap els plor
		car ilh so an merit,
	5	qu’en tal don’ an chauzit
		don an fayt falhimen,
		car qui aut pueya bas dissen:
		pero en sa merce m’aten,
		car yeu non cre que merces aus falhir
	10	lay on Dieus vol totz autres bes assir.
II		E si conosc d’Amor
		que mos dans l’a sabor,
		que so don ay largor
		me fay prezar petit,
	15	e ponhar ad estrit
		de tal que si·m defen:
		so que m’encausa vau fugen
		e so que·m fug yeu vau seguen;
		aisi no say cosi·m puesca gandir,
	20	qu’essems m’aven encausar e fugir.
III		Er auiatz gran folor:
		c’arditz soy per paor,
		que tan tem la dolor
		d’amor que m’a saizit
	25	c’ayso·m fai pus ardit
		de mostrar mon talen
		a leis que·m fay velhar dormen;
		donc, ay per paor ardimen,
		aysi com sel qu’estiers non pot guerir
	30	e vai totz sols entre cinc cens ferir.
IV		Pros dona cuy adhor,
		restauratz en valor
		mi e vostra lauzor,
		c’amdui n’em afreolit,
	35	car metetz en oblit
		mi que·us am finamen;
		car sels qu’o sabon van dizen
		que fol servir fai manta gen,
		e car vos am tan que d’als nom cossir
	40	pert mi e vos: gardatz si·m dey marrir.
V		Ieu oc! c’oguan per flor
		no·m viratz chantador
		mais precx de mo senhor,
		del bon rey, cuy Dieus guit,
	45	d’Aragon, m’an partit
		d’ir’ e de marrimen,
		e si chant tot forsadamen;
		mas al seu plazen mandamen
		non devon ges siei amic contradir,
	50	c’als enemicx vei que·s fay obezir.
VI		Sai vas la dolor de la den
		vir la lengu’, a lieis cui mi ren,
		et er merces si·m denha aculhir,
		qu’e mans bos luecs fach son ric pretz auzir.
	55	Bels N’Azimans, Dieus mi gart de falhir
		vas lieis que falh vas me, s’o auzes dir.