Salverda de Grave, Jean-Jacques. Le troubadour Bertran d'Alamanon. Toulouse: Imprimerie et librarie Édouard Privat, 1902.

Code: 076,011 Auteur: Bertran d'Alamanon Genre: Sirventes Numero: VI

Lo segle m'es camiatz

I	1	Lo segle m’es camiatz
		Tan fort, don suy iratz,
		Qu’a penas sai que·m dia ;
		Qu’ieu suelh esser uzatz
	5	De chans e de solatz
		E de caualairia,
		Mesclat ab cortezia ;
		E so per qu’om ualia
		Era ma uoluntatz
	10	Et en ditz et en fatz
		Et en tot quan podia ;
		E las domnas uezia,
		Selhas cuy ualor tria
		Ab lur plazens beutatz,
	15	Don era conortatz
		De gran ioy que n’auia ;
		E trac en garentia
		Amor que m’ i mouia :
		Del tot m’ era donatz
	20	A so que ualor platz,
		E·l segle m·o sufria.
		Aras tem que blasmatz
		En fos e condampnatz
		S’ieu res d’aisso fazia.
II	25	Del tot mi sui uiratz,
		Totz enicx e forsatz,
		A sso que no·m platz mia.
		Que me couen de platz
		Pensar e d’auocatz,
	30	Per far libelhs tot dia ;
		E pueys esgart la uia,
		Si nulhs corrieus uenria ;
		Qu’ilh uenon daus totz latz,
		Polsos et escuyssatz,
	35	Que la cort los m’enuia ;
		E si dizon folhia,
		Blasmar non l’auzaria.
		Pueys me dizon : « Pujatz,
		En cort es demandatz ;
	40	La pena s’escrieuria,
		Qu’om no·us perdonaria
		Si·l iorn en uos falia ».
		Ueus a que suy tornatz,
		Senhors, ar esgardatz
	45	Si sui ben a la lhia :
		Qu’ieu am trop mais lo glatz
		No fas las flors dels pratz,
		Que no sai on me sia.
III		Senhors, a Dieu siatz,
	50	Quar hom que uiu iratz
		Ual meyns que si moria ;
		Qu’al rey Castellan platz,
		Qu’es sobre totz honratz,
		Qu’ieu tengua lai ma uia,
IV	55	Qu’en elh m’er restauratz
		Jois e chans e solatz,
		Qu’alhors non reuenria.