Stroński, Stanislas. Le troubadour Elias de Barjols. Toulouse: Imprimerie et librairie Édouard Privat, 1906.

Code: 132,010 Auteur: Elias de Barjols Genre: Canso Numero: V

Pus la belha que·m fai doler

I	1	Pus la belha que·m fai doler
		denh’en grat mas chansos auzir,
		be·m dey en chantans esbaudir
		e mostrar e far aparer
	5	que per autra no suy guays ni chantaire
		mas quant per lieys cuy suy obediens ;
		qu’ieu no suy ges dels fals drutz debatens
		que de mal loc cujon fals’ amor traire,
		qu’ie·l repropchier que·l savi[s] ditz enten
	10	qu’onor e pretz conquer hom mal-trazen.
II		Amors me ditz que bon esper :
		puesc leu ab fin ioy avenir.
		E sens ditz me : « fol[s], vols t’auzir,
		que preyar tostemps mal parer. »
	15	Amors me ditz qu’ieu sia fis amaire
		e sens ditz me : « fols yest, e si t’entens ! »
		Ara·m diguatz, amors, e vos e sens :
		co farai doncx, pus no m’en puesc estraire ?
		Amarai, hoc, si li platz, ni·l es gen
	20	e, si no·l platz, amar l’ai eyssamen.
III		Amar m’er tot outra poder,
		pus estiers no m’en puesc partir ;
		cum selh qu’es iutjatz a murir
		e merce[s] no·l pot pro tener
	25	e·l demandon mil tans que no pot faire
		.    .    .    .    .    .    .    .    .    .    .    .    .
		aysselh suy ieu, que sobramar[s] me vens.
		Bona dompna, cortez’ e debonaire
		ar es ben dregz qu’ieu vos am per un cen,
	30	quar tot[z] lo mon[s] vos ten per plus valen.
IV		Dona, merce[s] me deu valer
		qu’a faitz manhs paupres enriquir ;
		vos me podetz far o delir,
		o aut pujar o bas chazer.
	35	Et es honors, qui en frevol repaire
		fa fort castelh ni tors ni bastimens ;
		e pus faitz es lo bos comensamens,
		bona dompna, no vo·n vulhatz estraire,
		quar comensar pot hom leugeiramen
	40	mas a la fin son tug bon fag parven.
V		En vos son pauzat miey voler
		e miey talan e miey dezir
		e mon cor : on qu’ieu an ni·m vir
		reman sai en vostre poder.
	45	Doncs, pus no·us aus dir so que·us vuelh retraire,
		vostre gen cors amoros e plazens
		deu esguardar quals es mos pessamens,
		quar, si·m faitz mal, ia non serai clamaire,
		que contra vos non auria guiren,
	50	mas tot sia e·l vostre chauzimen.
VI		Pros comtessa, qui·l ver en vol retraire,
		vos etz dona de pretz e de ioven
		e guitz d’amor e caps d’ensenhamen.