Salverda de Grave, Jean-Jacques. Le troubadour Bertran d'Alamanon. Toulouse: Imprimerie et librarie Édouard Privat, 1902.

Code: 076,001 et 197,001 Auteur: Bertran d'Alamanon , Guigo de Cabanas Genre: Deux coblas avec tornada Numero: XII

Amicx Guigo, be·m asaut de ton sen / Si crit, Bertrans, per cels que son valen

		a
I	1	Amicx Guigo, be·m asaut de ton sen,
		Car de mestiers vols apenre cals so ;
		Que trotiers fus una longa sazo ;
		Pueis auzi dir que pugiest a siruen,
	5	Qu’enblauas buous, bocxs, fedas e moutos ;
		Pueys fus ioglars de dir vers e chansos ;
		Ar iest poiatz a maior onramen,
		Que·l conzs n’a fag cauaier saluatie.
II		E can iras, Guigo, cridar la gen,
	10	« Gelozia » cridaras per Meisso,
		E « Cobeitat » per lo duc de Torcho
		E Miullon per « parlar sotilmen »,
		E per « beure » sel cuy es Cortesos,
		E per « engan » cel de cui es Salos,
	15	E cridaras Lunel per « sobresen »,
		E Castelnou per « ceb’ e per formatie ».
III		Aiso crida, Guigo, totas sazos,
		Tro que crides : « Proeza per los pros !
		Caualier layt, trop es de donar len !
	20	A foc, a foc, per restaurar paratie. »
		b
		Gigo li respondet aisi.
IV		Si crit, Bertrans, per cels que son valen,
		No·m cal cridar per vos « Alamano »,
		Qu’ieu vey tot l’an ses honor e ses pro
		C’anatz la cort de Proensa seguen ;
	25	E non es faytz per vos condutz ni dos,
		Pero de motz vernassalhs, enueios
		No sap nulhs homs mielhs de vos far paruen ,
		E ia per me non perdatz vostr’ uzatie.
V		Vostre frayre, Bertram, al partimen
	30	Parti e pres per que·l ten hom per pro :
		Qu’el pres tot ço que tanh ad home bo
		E layset vos tot ço c’om maluat pren ;
		Qu’el vos layset de tota valor blos,
		Mal vos laisset et tot be vos secos :
	35	Gran maluestat ab croy captenemen,
		E gran cors flac farsit d’auol coratie.
VI		[Q]i qe crit « Proeza » per los pros,
		Eu cridarai « Auolessa » per uos
		.   .   .   .   .   .   .   .   .   .   .   .   .
	40	E cridarai « Flaqesa » e « Uolpilatge ».