Salverda de Grave, Jean-Jacques. Le troubadour Bertran d'Alamanon. Toulouse: Imprimerie et librarie Édouard Privat, 1902.

Code: 437,010=076,002 Auteur: Sordel , Bertran d'Alamanon Genre: Tenso (Partimen) Numero: XIII

Bertrans, lo joy de dompnas e d'amia

I	1	Bertrans, lo joy de dompnas e d’amia
		Qu’avetz avut ni ja nulla sazo
		Aures, cove que perdatz per razo,
		O·l pretz d’armas e de cavallairia ;
	5	Pero selha creira cuy etz aclis,
		Ses plus qu’ades siatz ab armas fis.
		Qual voletz mai laissar a vostra via
		O retener? Qu’ieu say ben qual penria.
II		Tan lonjamen ai amat ab fadia
	10	E tam pauc m’an dompnas tengut de pro,
		Amicx Sordelh, per qu’ieu prenc lo resso
		E·l pretz d’armas, e lays vos la follia
		Que faitz d’amor, don lunh hom no·s jauzis,
		Enans n’a meynhs qui pus s’i afortis,
	15	E pretz d’armas enansa quascun dia :
		Per qu’en l’enans punharai, on qu’ieu sia.
III		Be sai partir, Bertran, e vos mal penre,
		E parra be ans que·us partatz de mi,
		Que ses amor luns hom no a pretz fi ;
	20	Qu’avetz chauzit, gent fariatz a pendre,
		Quar anc laissetz ioy, dompney ni amor,
		Per sofrir colps, fam e freg e calor ;
		Tot so vos lays, qu’en amor vuelh entendre,
		Que·l pus belh joy del mon mi fai atendre.
IV	25	Be mi sabrai, Sordelh, de vos defendre
		Que·l mielh ai pres e dirai vos cossi :
		Iretz vezer lieys qu’amatz ab cap cli,
		Pueis ab armas no vos auzatz contendre
		A lunh home ? Joy voletz ses valor,
	30	Et yeu lo pretz qu’hom te per lo melhor ;
		Que joy d’amor ve hom for[t] leu deyssendre
		E pretz d’armas aut pujar et estendre.
V		Sol creza leis en cuy ay m’esperansa
		Qu’ieu si’ arditz, Bertran, ab gaug entier
	35	Viurai tos temps, qu’ieu non pretz un denier
		Autre despretz ni autra benanansa ;
		E vos irez cazen e derrocan,
		Qu’ieu remanrai ab ma dompna baizan ;
		E si be·us faitz dels ponhedors de Fransa,
	40	Us dous baizars val ben un colp de lansa.
VI		Amicxs Sordelhs, falsa es vostr’ amistansa,
		Qu’ieu no vuelh lieys qu’am ab cor vertadier
		Conquis aver per lunh pretz messongier,
		Qu’aital plazer tenri’ a malanansa ;
	45	Per qu’ieu vos lais d’amor trastot l’enjan,
		Que pretz d’armas vuelh e quier e deman.
		Vencut vos ay, quar trop fai gran enfansa
		Qui joy d’enjan ab prez d’armas balansa.
VII		La comtessa valenz q’a prez prezan,
	50	Cylh de Rodes, jutge, amicx Bertran,
		Nostra tenso, quar ylh viu ses eguansa
		De mantener dompney, salvan s’onransa.
VIII		Amicx Sordelh, la comtessa val tan
		Que ben la·i vuelh, mas ye·y met en Johan
	55	De Vallari, qu’ab pretz d’armas s’enansa ;
		Per qu’ie·lh tramet lo jutgamen en Fransa.