Stroński, Stanislas. Le troubadour Elias de Barjols. Toulouse: Imprimerie et librairie Édouard Privat, 1906.

Code: 132,004a Auteur: Elias de Barjols Genre: Canso Numero: VI

Ben fui conoyssens a mon dan

I	1	Ben fui conoyssens a mon dan,
		dona, quand conuc en vos
		lo plazen semblan amoros
		e·l vostre guai cors prezan !
	5	Qu’anc pueys non aic poder en me
		que·m pogues de vos estraire
		ni vas negun’ autra traire,
		ni vos non aus clamar merce.
II		Mas, bon conort ai de l’afan,
	10	dona, quez ieu trac per vos,
		quar bos senher ren guizardos,
		qui be·l serf de bon talan ;
		servida·us ai per bona fe
		de ben-amar ses cor vaire
	15	e, si pus hi pogues faire,
		ia no m’en tarzera en re.
III		Ges no·m vir e no·m vau chanjan,
		avinens dona, de vos,
		ni non es mais del cel en ios
	20	nulh’autra quez ieu am tan ;
		e fas esfortz quar no·m recre,
		valentz dona debonaire,
		pus no·us aus mon cor retraire
		ni preyar que·m fassatz nulh be.
IV	25	Ben podetz far vostre coman
		qu’ieu non ai poder en vos
		e no suy d’aitan poderos !
		Que mon fin cor ses enjan
		no·us aus far saber ni·s cove,
	30	mas ieu cum bos sufertaire
		e cum fis leyals amaire
		sofrirai qu’a sofrir m’ave.
V		E quar no vos aus far semblan
		que·us am, dregz fora de vos,
	35	donna, si vostra merces fos,
		que·us anassetz albiran
		quo vos am e vos vuell e·us cre
		e·us suy de ben razonaire
		quar adoncx no·m tengra guaire
	40	le maltraitz que per vos mi ve.
VI		La valen[s] comtess’ ha en se,
		de Proencha, debonaire
		cho don chascus es lauszaire
		de fina valor de tot be.
VII	45	E·l conte, mon seignor, ai fe,
		que si’ en loc de son paire,
		Qu’a totz aug dir e retraire
		Que mais l’am’ hom on plus lo ve.