Stroński, Stanislas. Le troubadour Elias de Barjols. Toulouse: Imprimerie et librairie Édouard Privat, 1906.

Code: 132,004 Auteur: Elias de Barjols Genre: Canso Numero: XII

Ben deu hom son bon senhor

I	1	Ben deu hom son bon senhor
		amar e servir
		et honrar, et obezir
		a tota s’onor,
	5	e de mal senhor ses merce,
		quant ponha·ls sieus en desfaire,
		se deu hom qui pot estraire,
		quant sos servizis pro no·lh te.
II		Atressi·s deu hom d’amor
	10	per bon dreg partir,
		quant ve que no·n pot iauzir
		ni·l val ni·l acor ;
		per qu’ie·m part forsatz e·m recre
		d’amor cuy suy merceyaire,
	15	car anc iorn no·m volc ben faire
		ni non ac chauzimen de me.
III		Partitz me suy de l’error,
		en que·m sol tenir
		amors, e del lonc dezir,
	20	don non sen dolor ;
		e s’eu anc dels mals trais granre
		e dels bes no·m lausei guaire,
		sos dans m’es greus a retraire
		aitan li port de bona fe.
IV	25	Ia mais semblant trichador
		no·m poiran ausir
		ni·ll meu no·m faran languir
		huelh gualiador,
		quar folhs es qui sos folhs huelhs cre,
	30	mayntas vetz, so m’es veiaire,
		e fols qui trop es guardaire
		d’aisso que no·l tanh ni·l cove.
V		Al valent emperador
		vuelh mostrar e dir
	35	que totz met Dieus en azir
		mas son servidor ;
		e pus Dieus l’a donat de que,
		serva·l a dreg l’emperaire
		qu’om del mon no pot plus traire
	40	mas tant quant aura fach de be.
VI		Comtessa Beatris, gran be
		aug de vos dir e retraire,
		quar del mon etz la belaire
		de las autras dompnas qu’om ve.
VII	45	En Blacas ies no se recre
		de son fin pretz enan-traire
		ans val mais que no sol faire
		e melhur’ e creys so que te.