Stroński, Stanislas. Le troubadour Elias de Barjols. Toulouse: Imprimerie et librairie Édouard Privat, 1906.

Code: 132,007a Auteur: Elias de Barjols Genre: Tenso (Partimen) Numero: XV

En Iaufrezet, si Dieus ioi vos aduga

I	1	En Iaufrezet, si Dieus ioi vos aduga,
		ara prenetz d’aqetz dos partimenz :
		tres gradaletz podetz aver d’eruga
		si·us abelis, mas a totz iornz rendenz
	5	Na Biatris, Na Mabil’ e N’ Uga,
		que chascun’ es bella domn’ e plazenz.
		La qal razon tenretz per plus astruga ?
		Car eu sai ben qe totz hom conoiscenz
		pot ben chauzir lo miels se·ls oils no cluga.
II	10	Pueis tan voletz, N’Elyas, qu’eu i prenda
		dels partimenz penrai cel qui·m sab bo :
		l’eruga voil aver qeg iorn de renda,
		q’a las domnas non tenri’eu nul pro
		ne las a mi, per q’es dregz qu’ie·m defenda,
	15	q’al maior ops lur diri’eu de no ;
		ni ia no vol qe neguna contenda
		un iorn per so mi trueb eu en tenzo ;
		ar ai trop dig ad home che m’entenda.
III		Ben nos enten, amics, qe voletz dire,
	20	En Iaufrezet, tant m’o dizetz vos plan :
		lo ioi d’amor tenetz a grieu martire —
		qi vi anc mais [tan estrain crestian —
		qe] non voletz mais lo solatz e·l rire,
		qe l’autre ioi tenetz per soteiran,
	25	qe d’una vetz n’aures pro, so m’albire ;
		l’eruga·us lais ab qe manges de pan
		q’eu no la vueill, ia Dieus tan no m’azire.
IV		Mais am estar en tan grieu penedenza
		q’eu non fera si l’autre agues pres,
	30	q’a sol’ una non puesc eu far valenza,
		donc qi eu·s sembla qu’eu lo conplis de tres ?
		Enan voil far de mon cor estenenza
		qe comenzar so q’eu far non pogues.
		E vos, N’Elias, anas per Proenza
	35	qeren vostr’ ops e de mi non penses,
		car ieu ai pres tot zo qe plus m’agenza.
V		En Iaufrezet, ben vos puesc en ver dire
		qe ia·N Blacatz ab vos no s’en tenra,
		si tot non a d’amor mais lo dezire.
VI	40	Mais En Blacatz fai, truep, long’ entendenza,
		Amics N’Elias, trop ben l’i n’es pres,
		car el degra fenir so qe comenza.