Salverda de Grave, Jean-Jacques. Le troubadour Bertran d'Alamanon. Toulouse: Imprimerie et librarie Édouard Privat, 1902.

Code: 189,002=076,006 Auteur: Granet , Bertran d'Alamanon Genre: Tenso Numero: XVIII

De uos mi rancur, compaire

I	1	De uos mi rancur, compaire
		Em Bertram, qe no·m faiz be,
		Qe·us ai seruit ses cor uaire
		E nul profeiz no m’en ue ;
	5	E si no·m uolez ben faire,
		Eu dirai de uos tal re
		Qe·us enoiera, so cre,
		Car sai trop de uostr’ afaire.
II		Granez, pos uolez retraire
	10	De me so que no·s coue,
		Eu pugnerai en desfaire
		Cho qe si sabes be :
		Arloz es plen de put aire,
		Q’eu te leuei de non re,
	15	Don degras partir ab me
		So qe dels altres pos traire.
III		Seigner, per qe·us celeria ?
		Flaces’e cubitat gran
		E·ls mals aibs q’apres auia,
	20	So sabez c’ab uos estan.
		Cant no·m tengron pro nul dia,
		Ni·m feron mas anta e dan,
		E iois no·n nais, mais affan,
		Mon gazaing per qe’us partria ?
IV	25	Desconoscenzha e ffollia
		Granez, me dis en chantan,
		E sapchas qe anc nul dia
		Non te forfis mas sel an
		Q’eu te mis en iugleria,
	30	C’anavas als pes trotan ;
		E qar mon dreg te deman,
		Ar me dis tu villania.
V		Vostra razo no·m par bona,
		Seigner, q’en manz locs diuers
	35	Laus uostra flancha persona,
		E qerez mi mais enquers,
		Part de tot qant c’om mi dona ;
		Ainz uolgra fosses greues ;
		Car soi los diz m’en sunt fers,
	40	Mal aia qi·m n’arazona.
VI		Granez, chascus m’ocaissona
		Car anc n’en pren lo ters,
		E no·m cal c’om uos dispona,
		Car ben entendez mos uers...