Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Code: 030,016 Auteur: Arnaut de Maruelh Genre: Canso Numero: I

La grans beutatz e·l fis ensenhamens

I	1	La grans beutatz e·l fis ensenhamens
		e·l verais pretz e las bonas lauzors
		e·l cortes ditz e la fresca colors
		que son en vos, bona domna valenz,
	5	me donon gienh de chantar e sciensa,
		mas grans paors m'o tolh e grans temensa
		qu'ieu non aus dir, domna, qu'ieu chant de vos,
		e re no sai si m'er o dans o pros.
II		Qu'ieu vos am tan, domna, celadamens
	10	que res no·l sap mas quant ieu et Amors
		ni vos eyssa, tan grans sobretemors
		m'o tol ades que no·us aus far parvens ;
		tal paor ai qu'ira e malsabensa
		m'aiatz, domna, quar vos port benvolensa,
	15	e pus no·us aus ren dire a rescos,
		dirai vos o sevals e mas chansos.
III		Ja non serai vencutz ni recrezens
		de vos amar, sia·m sens o folhors !
		quar s'ieu folhey per vos, mais m'es d'onors
	20	que s'ab autra m'aondava mos sens ;
		e si ricors me tol vostra valensa,
		per merce·us prec qu'umilitatz vos vensa,
		sevals d'aitan, domna genser qu'anc fos,
		que mos servirs vos plass' e·us sia bos.
IV	25	Aissi·us autrey, pros domna conoissens,
		mon cor, e ja no·m virarai alhors,
		e vos faitz me, quan vos plaira, socors,
		qu'ieu vos serai de totz los mals guirens,
		sol que·us plassa que·m donetz mantenensa
	30	o cor, dona, que d'amar vos cossens' a,
		que no·m siatz de semblant orgulhos
		a me que us suy fizels et amoros.
V		Domna genser qu'anc fos de nulhas gens
		e la mielher de totas las melhors,
	35	per vos morrai, so·m ditz ades paors,
		si no·us en pren merces e chauzimenz.
		Bona domna, aiatz en sovinensa
		el cor, e ja no m'en fassatz parvensa,
		tro conoscatz que ben sia sazos
	40	que·m n'eschaya qualque·us platz guiardos.
VI		Mon Bel Esgart, saber e conoissensa
		e totz bos ayps vos fan aver valensa,
		per qu'ieu retrac vostre pretz cabalos
		al mielhs qu'ieu sai en mas humils chansos.