Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Code: 030,015 Auteur: Arnaut de Maruelh Genre: Canso Numero: III

La franca captenensa

I	1	La franca captenensa
		qu'eu non puosc oblidar,
		e·il doutz ris e l'esgar
		e·il semblan qu'ie·us vi far,
	5	mi fant, dompna valens,
		mieiller qu'ieu non sai dir,
		dinz del cor sospirar ;
		e si per mi no·us vens
		Merces e Chauzimens,
	10	tem que·m n'er a morir.
II		Ses geing e ses faillensa
		vos am, e ses cor var,
		al plus c'om pot pensar ;
		d'aitan vos puosc forsar
	15	part vostres mandamens.
		Ai ! dompna cui desir,
		si conoissetz ni·us par
		que sia faillimens
		car vos sui benvolens,
	20	sofretz m'aquest falhir.
III		Tant etz de gran valensa,
		mais vos am ab cor clar
		ses pro merce clamar,
		c'ab autra gazaignar.
	25	E·l vostr' enseignamens,
		puois no m'en puosc partir,
		fasa·us humiliar
		tant que·l vostre cors gens,
		amoros e plazens,
	30	si no·m vol, no m'azir.
IV		Dompna, per gran tamensa,
		tant vos am e·us teing car,
		no·us aus estiers pregar.
		Mas plus fai ad honrar
	35	us paubres avinens
		que sap honor grazir
		e·ls bes d'amor celar,
		c'us rics desconoissens,
		cui par que totas gens
	40	lo deian obezir.
V		Plus non ai de plivensa,
		ni puosc razon trobar
		don m'aus asegurar
		que ja·m deignetz amar ;
	45	mas ditz mos ferms talens
		que poiri' avenir ;
		no·m dei desesperar,
		que tals es pauc manens
		cui fai astres e sens
	50	en gran ricor venir.
VI		Genoës, ses faillir,
		on plus aug demandar
		cortes faitz avinens
		de reis o d'autras gens,
	55	lo vostre vei chausir.