Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Code: 030,026 Auteur: Arnaut de Maruelh Genre: Canso Numero: IV

Us jois d'amor s'es e mon cor enclaus

I	1	Us jois d'amor s'es e mon cor enclaus,
		humils e rics e ples de gran doussor,
		et a·m donat aitan gran ardimen
		qu'amar mi fai del mon la gensor domna ;
	5	et am la tan c'ades on plus mi duelh
		me fai lo jois de bon esper jauzir,
		per que l'afans non pot esser engres.
II		Mas lo mals m'es de tan doussa sabor,
		be·m par que·l bes mi pogues far jauzen,
	10	quar s'ieu n'agues sol aitan que·l siei huelh
		m'esguardesson per amor, anz mais domna
		nulhs amaire no saup mais obezir
		qu'ieu feira lieis, e farai tot ades,
		qu'Amors o vol que ten de mi las claus.
III	15	Francx cors gentils, on pretz e jois s'enten,
		lo dezirier am mais de vos e vuelh
		qu'aver d'autra tot quan de vos dezir ;
		mas tant es ders sobre tot' autra domna
		vostre rics pretz, que de las melhors es
	20	capduelhs e caps, per qu'ieu dire non aus
		que ja·m denhetz penre per servidor.
IV		Mas per Meree, qu'es guerreira d'Orguelh,
		vos prec que ges, si·m complanc, no m'azir
		vostra valors, quar tan m'es el cor pres
	25	qu'ades soplei lai on vos es, pros domna,
		e·us clam merce, sai pensan, e repaus,
		on qu'ieu m'estey, mon cor en vostr' amor,
		si qu'ieu ren als non ai em penssamen.
V		S'estiers no·us platz que·m vulhatz enriquir,
	30	no·us pes s'ie·us am ni sui vostre conques,
		quar la beutatz, qu'es en vos, e·l rics laus
		mi ten defes qu'ieu non am autra domna ;
		e mas Amor m'adutz aitan d'onor,
		no·m don ja Dieus nulh ben a mon viven,
	35	s'ieu ja per ren de vos amar mi tuelh.
VI		Domna genser que anz al mon nasques,
		tant m'es de vos l'aspre doutz e suaus,
		per qu'ieu no puesc mon cor virar alhor ;
		a ! s'er ja temps qu'a dreit vos apelh domna,
	40	qu'ie·us sia homs, mans juntas, lialmen,
		e atressi cum bons senher acuelh
		son lige ser, mi denhetz aculhir... !
VII		Domna, Amors m'a dat tant d'ardimen,
		quar sap qu'ieu fis vos sui e no·m destuelh,
	45	qu'el cor m'a fag miral ab que·us remir.
VIII		Domna, de Pretz sui en l'aussor capduelh,
		mas per semblan mon cor no vos aus dir.
IX		Domn', el semblan podetz mon cor chauzir.