Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Code: 030,024 Auteur: Arnaut de Maruelh Genre: Canso Numero: VII

Tot quant ieu fauc ni dic que·m si' honrat

I	1	Tot quant ieu fauc ni dic que·m si' honrat
		me mostr' Amors que m'es al cor assiza ;
		e lai on vey plus ferma voluntat
		de pretz conquerr' e de joy mantener
	5	esforsi·m mais de far e dir plazer ;
		quar mesur' es e sabers et honors
		qu'om puesc' esser plus plazens als melhors.
II		Mout fora greu, mas quar ven tant en grat,
		lo mals d'amor franh, perci' e us' e briza,
	10	e·l gaug que son ab la dolor mesclat
		fan la pena e l'afan leu parer ;
		qu'ieu fora mortz, mas un jauzen esper,
		m'a enrequit, gent conortat e sors ;
		e si·n trac mal, ieu n'aten gen secors.
III	15	Qu'aissi m'a tot Amors vout e virat
		d'autres afars, e tornat a sa guiza,
		tug silh qu'ieu vey mi semblon folh e fat,
		qu'ab lur non puesc solatz d'amor aver
		per vos, dona, don no part mon voler.
	20	E s'ieu ja·l cor vir per amar alhors,
		no·m valha Dieus ni Merces ni Amors.
IV		Mout estai gent franquez' ab gran beutat ;
		doncx si cum es la genser qu'anc fos viza,
		dona, si·us platz, aiatz humilitat
	25	de mi que sui totz el vostre poder.
		Valha·m ab vos Merces e Car Tener,
		qu'en breu seran mey ris tornat en plors,
		si·l mieu fin cor no vens vostra valors.
V		D'Amors no·m par qu'am puesca far meitat,
	30	quar, segon dreg, pus es pel lonc deviza,
		d'aqui enan deu aver nom camjat.
		Per so no·us cal, bona dona, temer
		que ja vas vos tan falha, mon saber,
		que·ls vostres mans no tenha per senhors,
	35	neus amaray, si·us platz, mos nozedors.