Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Code: 030,022 Auteur: Arnaut de Maruelh Genre: Canso Numero: VIII

Si cum li peis an en l'aiga lor vida

I	1	Si cum li peis an en l'aiga lor vida
		l'ai eu en joi e totz temps la·i aurai,
		c'Amors m'a faich en tal dompna chausir
		don viu jauzens sol del desir qu'ieu n'ai,
	5	tant es valens que, quan ben m'o cossir,
		m'en nais orguoills e·m creis humilitatz ;
		mais si·ls ten joins amors e jois amdos,
		que ren no·i pert mesura ni razos.
II		Tot autre joi desconois et oblida
	10	qui ve·l sieu cors coind'e cortes e gai,
		qu'enaissi sap d'avinen far e dir
		ab purs plazers tot so qu'ill ditz ni fai,
		qu'om no·n pot mal dire senes mentir ;
		en lieis es pretz, honors, senz e beutatz,
	15	e si no·m val sos gens cors amoros,
		Amors n'a tort, car m'en fai enveios.
III		Bona dompna de totz bos aips complida,
		tant etz valens part las meillors qu'ieu sai,
		mais am de vos lo talen e·l desir
	20	que d'autr' aver tot so c'a drut s'eschai ;
		de tan n'ai pro, que del plus tem faillir,
		pero no·n sui del tot desesperatz,
		qu'en ricas cortz ai vist maintas sazos
		paubr' enriquir e recebre gens dos.
IV	25	Ves lo païs, pros dompna issernida,
		repaus mos huoills on vostre cors estai,
		e car plus pres de vos no·m puosc aizir,
		tenc vos el cor ades e cossir sai
		vostre gen cors cortes, qui·m fai languir,
	30	e·l gen parlar e·l deport e·l solatz,
		lo pretz e·l sen e la beutat de vos,
		don pois vos vi non fui anc oblidos.
V		Dompna, cui pretz e jois e jovens guida,
		ja no m'ametz, totz temps vos amarai,
	35	c'Amors o vol, ves cui no·m puosc gandir,
		e car conois qu'ie·us ai fin cor verai,
		mostra·m de vos de tal guisa jausir,
		penssan vos bais e·us manei e·us embratz :
		aquest dompneis m'es doutz e cars e bos,
	40	e no·l mi pot vedar negus gelos.
VI		Mos Gens Conquis, jois e pretz e solatz
		vos tenon gai vostre cors e joios,
		per qu'om no·us ve que no s'azaut de vos.
VII		Ves Mon Frances voill que·s n'an ma chansos,
	45	car es adrechs e gais et amoros.