Gresti, Paolo. La canzone "En est son far chansonet'ai noelha" (BdT 328,1). "Zeitschrift für romanische Philologie", 116 (2000), pp. 237-259.

Postilla 2010.

Code: 328,001 Auteur: Peire de Blai Genre: Canso Numero: -

En est son far chansonet’ai noelha

I		En est son far chansonet’ai noelha,
		novelha es, quar ieu chant de novelh,
		e de novelh ai chausida·l pus belha,
		belha en totz sens, e tot quan fai es belh,
	5	per que m’es belh qu’ieu m’alegr’e·m deport,
		quar en deport val pauc qui no·s deporta.
II		Iois deporta mi, quar am dompn’ isnelha;
		isnelha es selha que·m te isnelh;
		isnelh cor n’ai quar tan gen mi capdelha,
	10	qu’ilh capdelha mi ses autre capdelh,
		que mais capdelh non quier mas per conort:
		que gen conort qu’ilh i ben me conorta.
III		Be·m conorta cill que m’es fin’ e franca,
		que franca m’er tostemps, e·m tenra franc;
	15	franc n’ai lo cor, qu’ab autra non s’estanca,
		si s’estanca d’amor on son estanc,
		qu’aissi m’estanc quais que alhor m’enten,
		mas lai enten vas on qu’alhors entenda.
IV		Quecx entenda, que m’amors no s’esbranca,
	20	qu’enans branca e creis e bruelh’en branc,
		que·l branc son fi d’amor clara e blanca
		per vos, blanca dompna, quar anc cors blanc
		tan blanc non vi quo·l vostre, don aten
		un tal aten que no·m plai qu’autr’atenda.
V	25	Doncx l’atenda vulhatz, dompna, qu’ieu prenga,
		e prenga vos merces del mal qu’ieu prenc,
		quar prenc en belh maltrag que ben m’en venga;
		aras venga del gran ben que m’en venc,
		e quar m’en venc ieu sofrisc e dezir
	30	un tal dezir que mos cors fort dezira.
VI		Fort dezira qu’ieu ab vos plag emprenga,
		e·l prenga breu, qu’ieu n’art totz e n’esprenc,
		que tant m’esprenc, qu’ieu n’ai paor qu’estenga;
		ans qu’estenga, mas ionchas vos estenc,
	35	mas quan m’estenc que lai los huelhs no vir,
		lo cor lai vir, si que alhors no·s vira
VII		Lai te vira, chanso, on mon cor tenc,
		quar de lieis tenc tot lo sen e l’albir
		qu’al mieu albir morrai, si no·s n’albira.
VIII	40	Si s’albira·l gai solatz que·m covenc,
		tal re·m covenc, don dei l’afan sofrir,
		qu’ieu vuelh sofrir so qu’autr’om no sofrira.