Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Code: 030,021 Auteur: Arnaut de Maruelh Genre: Canso Numero: XI

Ses ioi non es valors

I	1	Ses ioi non es valors
		ni ses valor honors,
		que Jois adutz Amors
		et Amors dompna gaia
	5	e gaiesa solatz
		e solatz cortesia ;
		per qu'ieu non vuoill un dia
		viure desconortatz,
		que neis quan sui iratz,
	10	eu chant e m'asolatz,
		cora c'avinen sia.
II		En joi ai mon esper,
		fin cor e ferm voler,
		e joi non puesc aver,
	15	dompna, tro c'a vos plaia,
		cui me sui autreiatz
		per aital aventura,
		c'Amors m'en asegura,
		mas vos m'en esfredatz.
	20	Mas una ren sapchatz,
		s'Amor e mi forssatz,
		trop etz salvatg' e dura.
III		El cor vos mir ades
		e, car no·us vei plus pres,
	25	la gensser c'anc nasques,
		prec vos que dans no·i aia.
		Bona dompna, si·us platz,
		a·l vostre pretz retraire,
		si jois de vos m'esclaire,
	30	es tant ma voluntatz,
		qu'en autres ambaissatz
		non fui alezeratz,
		pois ieu anc vos vi gaire.
IV		Dompna, per vos mi clam,
	35	car totz art et aflam,
		tant de bon cor vos am.
		Ai ! franca res veraia,
		car tant es aut poiatz
		lo desirs que·m tormenta,
	40	merce·us clam, dompna genta,
		colors d'autras beutatz,
		que s'ieu orguoill i fatz,
		la vostr' humilitatz
		per merce m'o cossenta.
V	45	Chausimen e merce
		podetz aver de me,
		qu'ie·us amarai jasse,
		e tot so que·m n'eschaia,
		dompna, penrai en patz
	50	aissi cum bos sufrire ;
		qu'ie·us am tant e·us desire,
		mais m'en val us oratz
		la nuoich, quan sui colgatz,
		qu'ie·us tengues e mos bratz,
	55	que d'autr' esser jauzire.