Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Code: 034,001 Auteur: Arnaut de Maruelh Genre: Vers Numero: XIV

En esmai et en consirier

I	1	En esmai et en consirier
		estai, et en gran pensamen
		mos cors, et en grant desirier,
		alques per foldat o per sen ;
	5	car lei qu'eu plus am e desir
		non aus mon talan descubrir,
		ni altr' amor non posc voler.
II		Amors me fai grant destorbier
		e per Amor m'aïr soven,
	10	car no m'a pres a soldadier
		l'amors qu'eu desir et aten,
		que·m fai sospirar e languir,
		car tot quant vei ni pos chausir
		non desir tant cum lei tener.
III	15	Mesura·m mou maint encombrier
		e·m dona trop enseignamen,
		per qu'eu me teing qu'eu no l'enquier
		lo seu enoi, ni·l faillimen
		ab que no·m deignes aculhir,
	20	que tal paor ai de faillir
		no·ill aus mon bon pens far saber.
IV		Tant ai ric talen e leugier,
		e vau ves lei plens d'ardimen,
		e·l ditz son verai et entier
	25	qu'eu cuig retraire en cort valen ;
		mas quant la vei, ren no·ill sai dir,
		anz pes que meill m'es de·l soffrir
		qu'auzir motz dont eu·m desesper.
V		Lai ! per que pert ric joi plenier
	30	verai, qu'anc no fi faillimen ?
		A mi no nosen lausengier,
		ni hom en mon dan non enten,
		ni eu non viu, ni puesc morir,
		tan greu pena me fai sofrir
	35	l'amors qu'eu pert per trop temer !
VI		Sei bel oill que son presentier,
		e la cara fresca rizen,
		e·l franc coratge dreiturier,
		qu'enquer vas home non enten...
	40	non sai que·m puosca devenir —
		que tanz bens m'es greus ad audir —
		s'ella·m geta e noncaler.
VII		Era t'en vei, franc messagier,
		si·l plai que·m prend' en chausimen,
	45	e parla bels ditz a sobrier,
		e si t'acuoill, torna coren,
		c'ab te pois meillz chai devesir
		so qu'eu non posc lai ademplir,
		tro per altrui ne sapcha·l ver.
VIII	50	E si·l plai que·m deign' acoillir,
		chai torn' a·l joi qu'eu tant desir
		tost ab que·m get de noncaler.
IX		Mas s'ilh no·m deigna acuillir,
		lo desconort no tornetz dir,
	55	qu'eu no·l voill audir ni saber.