Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Code: 030,025 Auteur: Arnaut de Maruelh Genre: Canso Numero: XVIII

Uns gais amoros orguoills

I	1	Uns gais amoros orguoills
		de lieis cui beutatz s'autreia,
		per la genssor qu'anc formes
		Amors e per la plus gaia,
	5	qu'ieu ai per la plus valen,
		m'a sazit tot mon coratge,
		si qu'ieu paresc als avals orgoillos,
		e son plus francs et humils als plus pros.
II		Don mercei lo cor e·ls huoills,
	10	car en tant onrad' enveia
		lor plac qu'enardir m'auses ;
		qu'el mon non cre tant ric n'aia
		que no·i agues honramen
		e no·i fezes vassalatge
	15	en enquerre lieis, que·m fetz un respos
		tant avinen qu'en viu gais e joios.
III		Bella dompna, ferms capduoills
		de vostre pretz, on qu'esteia,
		m'es ades del cor plus pres,
	20	qu'ieu non ai poder m'estraia
		d'enant vos a mon viven,
		ni del vostre seignoratge ;
		e si no·us platz mos enans e mos pros,
		volrai me mal, dompn', et amarai vos.
IV	25	Amors, merce, car acuoills
		que paratges te sopleia,
		qu'ieu tem que·m desesperes,
		mas una res m'en apaia
		don pren cor et ardimen,
	30	qu'enans qu'om tries paratge,
		t'enseignorist tant sobre·ls poderos
		que cant que·t plac fa pois ades razos.
V		Tant es sobre·ls aussors fuelhs
		lo sieus pretz e seignoreia,
	35	que negun trebal en res
		no·m tenh ni dolor qu'en aia,
		qu'ieu am mais, quar es plus gen,
		sofrir un honrat dampnatge
		que far guazanh, ont ieu honratz no fos,
	40	ni·l cortes digz falsar de mas chansos.
VI		Dona, de bon coratge
		vos am, e ja no·m fass' Amors joios,
		si el mon es res qu'ieu am tan cum vos.