Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Code: 030,018 Auteur: Arnaut de Maruelh Genre: Canso Numero: XIX

Lo gens temps m'abelis e·m platz

I	1	Lo gens temps m'abelis e·m platz,
		e·l ramelh carguat de verdor,
		que·l cor mi tenon en doussor
		d'un joy que·m melhur' e·m reve ;
	5	e chan merceyan, quar cove,
		si tot Amors no vol mon pro,
		yeu·lh clam merce e ma chanso,
		per restaurar los mals e·ls dans
		qu'avia pres ab belhs semblans.
II	10	Mala fui tant enamoratz,
		qu'anc pueys no fui jorn ses temor,
		e si Franqueza no·m secor
		no sai negun cosselh de me —
		Si fatz ! que·l clamarai merce
	15	ma belha domna, cui homs so,
		que·m do un bays en guazardo,
		et er li gratz aras mil tans
		que si·l m'agues donat enans.
III		Lonc temps aurai suffert em patz
	20	per Mon Belh Vezer grieu dolor,
		ni anc no vis nulh amador
		no·s cambïes mas quan sol me ;
		mas hieu sui selh que no·m recre
		d'amar lieys a cuy ai fag do,
	25	ab fin cor e lial e bo,
		de me per far totz sos comans,
		tant es adreit' e benestans.
IV		A dona non s'eschai beutatz,
		si no ten en car sa valor,
	30	qu'avol gent e folh parlador
		fan cujar als melhors tal re
		per que dechai son pretz e se,
		que·l semblans adutz l'ochaizo,
		si tot del fag se ditz de no ;
	35	per que non deu soffrir demans
		d'ome, si no l'es honors grans.
V		Dona vol qu'om sia privatz
		e que·s guart de dire folhor,
		pus qu'enquer los fis gaugz d'amor,
	40	e que sapcha far mielhs de be ;
		qui aital amic vol e cre,
		et als autres vol dir de no,
		e fai o per bona razo,
		quar quascus ditz qu'es fis amans,
	45	e·ls pluzors renhon ab enjans.