Cots, Montserrat. Las poesías del trovador Guillem de Cabestany. "Boletín de la Real Academia de Buenas Letras de Barcelona", 40 (1985-1986), pp. 227-330.

Cots, M., "Notas históricas sobre el trovador Guillem de Cabestany" > CdT: Observacions

Code: 213,001 Auteur: Guillem de Cabestaing Genre: Canso Numero: I

Aissi cum cel que baissa·l fuoill

I		Aissi cum cel que baissa·l fuoill
		e pren de las flors la genssor,
		ai eu chausit en un aut bruoill
		sobre totas la bellazor,
	5	car eis Dieus, senes faillida,
		la fetz de sa eissa beutat
		e mandet c'ab humilitat
		fos sa grans valors grazida.
II		Ab doutz esgart siei cortes huoill
	10	m'ant faich gai e fin amador,
		et anc l'amors per q'ieu mi muoill
		ab l'aiga del cor ma color
		no fon per mi espandida;
		mas era·m fai chantar de grat
	15	de tal on an maint coindeiat,
		c'us no la tenc desvestida.
III		Non dic feinchas ni laus, cum suoill,
		mas ver, don me son mil autor,
		c'usqecs desira so q'ieu vuoill,
	20	cal plus gai es lansa d'amor
		qe·l fer al cor ses gandida
		ab plazens plazers d'amistat;
		mas ieu ai·l colp asaborat,
		cum ieu plus dorm mi ressida.
IV	25	Chausimen fara si m'acuoill
		a merce contra sa ricor,
		q'ieu li mostre·l mal de qe·m duoill
		en que m'aleuge ma dolor
		c'a dinz mon cor espandida:
	30	Amor e Cossirier m'a dat,
		que del mieils m'a enamorat
		q'es del Puoi tro en Lerida.
V		Sos rics pretz es en l'aut capduoill
		de midonz c'om ten per genssor
	35	q'el mon si vesta ni·s despuoill:
		gent la saup Dieus far ad honor,
		c'aissi es pe·ls pros chauzida,
		lai on mostra sa gran beutat
		e son fin pretz tant esmerat
	40	c'a las pros n'esta garnida.
VI		Tant es genta e de bel escuoill
		q'enveia·m tol d'autras s'amor,
		c'ab enseignamen, ses janguoill,
		l'es dada beutatz ab valor,
	45	cortesia non oblida;
		c'us de cortesa voluntat
		la fai ses geing d'enemistat
		gardar e d'autra esbruida.