Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Code: 030,013 Auteur: Arnaut de Maruelh Genre: Canso Numero: XXII

Franques' e noirimens

I	1	Franques' e noirimens
		m'aduz e chausimens
		c'ades am ses falsura ;
		mas cals que sia·l bes,
	5	eu am mais trop ab vos,
		bella dompna e pros,
		totz temps far mon dampnatge,
		c'ab autra conqueses ;
		que tant grans honors m'es,
	10	tot mon maltraich meillura.
II		Tant es ferms mos talens
		en vos, dompna valens,
		non puosc aver mesura
		no·us am, ab que be·us pes,
	15	mas d'autra ren c'anc fos,
		c'aisso es l'ochaisos
		don m'avetz cor salvatge,
		e d'aisso, si·us plagues,
		s'autre tort no·us fezes,
	20	non degratz far rancura.
III		On plus vostre cors gens
		mi mostra espavens
		ni me desasegura,
		Amors, que mi a pres,
	25	m'en fai plus enveios,
		que·m te vostras faissos
		dedinz e mon coratge
		e mostra·m que Merces
		a mains autres conques :
	30	ve·us so que m'asegura.
IV		Franca res avinens,
		en cui jois e jovens
		e totz bos aips s'atura,
		a tort m'avetz comes ;
	35	qui tant cant pot es bos,
		(que plus no·il quier razos)
		e non es de paratge,
		sera, coms o marques,
		avols hom mal apres,
	40	qui jutga per dreitura.
V		Pros dompna conoissens,
		en cui es pretz e sens
		e beutatz fin' e pura,
		que natura i mes,
	45	cors gai et orgoillos,
		e semblans amoros
		de joi e d'agradatge,
		e sobre totas res
		son vostre faich cortes
	50	mais d'autra creatura.
VI		Chanso, ves Mon Frances
		t'en vai, quar ab lui es
		jois e bon' aventura.
VII		Senher En Genoës,
	55	lo fin pretz qu'en vos es
		creis ades e meillura.