Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Code: 030,019 Auteur: Arnaut de Maruelh Genre: Canso Numero: XXV

Mout eron doutz miei cossir

I	1	Mout eron doutz miei cossir
		e ses tot marrimen,
		quan la bell' ab lo cors gen,
		humils, franc' e de bon aire,
	5	me dis de s'amor estraire,
		don ieu no·m puosc partir ;
		e car ill no·m rete,
		ni l'aus clamar merce,
		tuich solatz mi son estraing,
	10	pos de lieis jois mi sofraing.
II		Dompna, si·us plagues sofrir,
		per vostre chausimen,
		c'ab doutz precs cars, humilmen,
		merceian cum fis amaire,
	15	vos auses mon cor retraire,
		en luoc d'autre gauzir,
		vos non costera re
		e mi feira gran be ;
		que·l malautes, quan si plaing,
	20	si no·il val, si s'en refraing.
III		Doussa dompna cui desir,
		per vostr' enseingnamen,
		vostre bel acuillimen
		no·m vedetz, que·m soletz faire ;
	25	del plus no·us aus preiar gaire,
		tant sui espaventatz,
		car etz de tant rics plais.
		Mas Ovidis retrais
		qu'entre·ls corals amadors
	30	non paratgeia ricors.
IV		Tant es per tot eissausatz
		vostre pretz rics e cars,
		tem que no·i val mos lauzars ;
		pero ben sai ses doptansa,
	35	si tot s'es plena·il balansa,
		qui met plus de l'un latz,
		sol un gran, pesa mais
		vas cella part lo fais —
		atressi creis vostr' honors,
	40	cum hom plus en ditz lauzors.
V		Enseignamens e beutatz,
		franques' e gens parlars,
		gens acuillirs et honrars,
		cortes' ab gaia semblansa,
	45	vos fant sobr' autras honransa ;
		per que jois e solatz
		reviu en vos e nais
		vas calque part biais,
		e no m'o fai dir Amors,
	50	mas vers e vostra valors.
VI		Genoës, so sapchatz,
		si cum abrils e mais
		es d'autres temps plus gais,
		es vostre rics pretz colors
	55	resplandens sobre·ls meillors.
VII		Frances, qui que·s biais
		ni de proeza·s lais,
		en vos es pretz e valors,
		gauz, e solaz et amors.