Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Code: 010,029 Auteur: Arnaut de Maruelh Genre: Canso Numero: App. I

Hom ditz que gaugz non es senes amor

I	1	Hom ditz que gaugz non es senes amor,
		mas hieu no·i truep mas enueg e pezansa,
		qu'anc no n'aic joi que no·m costes un plor,
		et enaissi dobla ma malanansa
	5	.  .  .  .  .  .  .  .  .  .  .  .  .  .  .
		qu'al prim qu'eu vi ma domna et ilh me,
		m'agra ben ops qu'adoncs no vis ieu re.
II		Anc mai mei huelh no·m foron traïdor,
		mas eras m'an traït ses desfiansa ;
	10	quar m'an trahit, assatz ai trahit lor,
		qu'ilh en ploran quascun jorn ses duptansa
		e·n pren lo cors en eus lo jorn venjansa,
		lo cor del sieu sospir que va ab se,
		et ieu del dan e del mal que m'en ve.
III	15	A lor ops an chauzit en la gensor
		mei huelh e pres segon la lur esmansa,
		mas a mos ops cauziron la peior,
		pus descobrir non l'aus ma fin' amansa ;
		qu'atressi·m puesc la reïna de Fransa
	20	amar, aisso no·m pot vedar, so cre,
		pus non l'enquier ni l'aus clamar merce.
IV		E non guardetz paratge ni ricor,
		dona, vas mi, mas vostra benestansa,
		quar ben podetz de bon faire melhor,
	25	et er lo pro mieus e vostra l'onransa,
		quar no fai trop qui·ls enansatz enansa,
		mas qui·ls humils enansa e soste,
		Dieu et amics e bon pretz en rete.