Mouzat, Jean. Le Troubadour Arnaut de Tintinhac: édition critique des poèmes précedée d'une introduction. S.L.: S. N., ca. 1957.

Code: 034,002 Auteur: Arnaut de Tintinhac Genre: Vers Numero: I

Lo joi comens en un bel mes

I	1	Lo joi comens en un bel mes,
		en la meillor sazo de l'an,
		quan li auzel menon lur chan
		ab lo dous termini d'estiu
	5	qu'aport una doussa sabor :
		per que s'alegron chantador —
		et ieu, las ! torn en recaliu...
II		Ves tal amor me vira·l fres,
		qu'anc no s'azautet de truan ;
	10	ni negus no s'en an gaban,
		ni sos amicx no l'en chastiu !
		qu'anc no fes blasme ni folor —
		ans porta de beutat la flor
		e de ric pretz nominatiu.
III	15	Petit son d'amoros cortes
		que sapchon gaire, al mieu semblan,
		enquerre d'Amor com ni quan...
		mas, pos joi es el mager briu,
		aqui pareisson li meillor
	20	que sabon tener fin' Amor —
		e·l fols eis de son senhoriu.
IV		S'anc Amors tornet en deisses,
		per fals amadors pres lo dan ;
		e·l fols cuja far prim l'enjan,
	25	e l'enjans volf sobre·l badiu,
		e l'amistat torn en error —
		e·l dan vezen, la colpa plor,
		e dizon tug qu'hom no s'i fiu !
V		Qui sap d'Amor quant bona es,
	30	ni com s'alegra ni reblan,
		e·l bel comensamen que fan
		a cel que sap esser amiu,
		leu pot enansar sa valor —
		e cilh qu'en son mal dizedor
	35	no foron anc del mielh jauziu.
VI		S'Amors fai ves amic que·l pes,
		ges no·s desconort per aitan,
		qu'ilh li rendra son joi doblan
		si no·l conois fol o auriu —
	40	Que domna qu'ama per amor
		no camja·l mielhs per sordeior —
		e, s'ilh s'irais, hom s'humeliu.
VII		Qu'ira d'amor porta merces,
		qu'ab ergueil vai contralassan ;
	45	e pueis, si·l vens, humelian,
		l'ira e·l mal e·l pes aiziu,
		don lo plaitz porta gran valor
		que renovela la doussor
		qu'en joi me confort e·m reviu.
VIII	50	En petit d'ora ve grans bes,
		si es que l'enquier' o·l deman,
		e de pauc joi ven hom a gran...
		per qu'ieu n'ai ric cor esforsiu,
		plen d'un bel respieg que·m secor —
	55	et aurai·l enquera major
		s'a midons platz que·m don e·m pliu !
IX		Bos es lo vers, e chantador,
		e volgra bon entendedor —
		Per Dieu, bels clercx, tu lo m'escriu !
X	60	Trametrai lo a la gensor
		qu'anc jagues de sotz cobertor,
		per cui ieu chant e van e piu.
XI		De Tintinhac ac la valor
		qui fes lo vers nominatiu.