Cots, Montserrat. Las poesías del trovador Guillem de Cabestany. "Boletín de la Real Academia de Buenas Letras de Barcelona", 40 (1985-1986), pp. 227-330.

Cots, M., "Notas históricas sobre el trovador Guillem de Cabestany" > CdT: Observacions

Code: 213,007 Auteur: Guillem de Cabestaing Genre: Canso Numero: VII

Mout m'alegra douza vos per boscaje

I		Mout m'alegra douza vos per boscaje,
		can retentis sobra·l ram qui verdeia,
		e·l rossignols de son chantar chandeia
		josta sa par el bosc per plain usaje.
	5	Et aud lo chant de l'ausel qui tentis,
		don mi rembra douza terra e·l pais
		e·l benestar de ma domna jausia,
		don mi dei ben alegrar, s'eu sabia.
II		Ben dei aver gran joi en mon corage,
	10	pois totz bons pretz en ma dompna s'autreia,
		e de beutat null'autra non enveia;
		tant la fe Deus de covinent estaje;
		car se era entre sos enemis
		non dirien qu'anc mais tan bella vis:
	15	sens es en lei, beutatz e cortesia;
		hom non la vei qui cent tans meill no·n dia.
III		En autra terra irai penre lengaje,
		si que ja mai en aquesta non seia,
		e·l lausengier, qui m'an mort per enveia,
	20	n'auran gran joi can me veran salvaje;
		e menerei com paubres pelegris,
		e·l desirer mi auran tost aucis,
		e se mai non, ben ai Amor servida
		e servirai tot lo jorn de ma vida.
IV	25	Va te·n, sospir, en loc de fin messatge,
		dreit a midon o totz bons pretz s'autreia,
		e digaz li que autre no m'enveia
		ni·m stau aclin vers autre seingnoratge
		can mi membra son bel oill e son vis.
	30	A pauc no·m muor can de lei me partis:
		partit non me·n ei ja ni me partria,
		anz es mos cors ab lei e noit e dia.