Blasi, Ferruccio. Le poesie di Guilhem de la Tor. Genève - Firenze: Leo S. Olschki S. A. - Leo S. Olschki, 1934.

Code: 236,011 Auteur: Guilhem de la Tor Genre: Sirventes Numero: X

Un sirventes farai d'una trista persona

I	1	Un sirventes farai d'una trista persona
		qui mal fai e mal ditz e mal met e mal dona,
		e mal ioga e mal ri e mal parla e pieitz sona,
		e plus en far tot mal chascun iorn s'abandona,
	5	per q'ieu de malvestat vuoill que port la corona.
		Sabetz cum el a nom? Porc Armat de Cremona.
II		Grans causa es d'auzir e fera descrezenssa
		tot lo mal q'es en lui e la desconoissenssa,
		don ia no·is partra mais, tant li platz e l'agenssa :
	10	q'anz volria esser mortz ses tota retenenssa
		q'el fezes negun faich d'adreicha conoissenssa;
		mas ab fols et ab orbs es tota sa guirenssa.
III		E feing se mout cortes e mena grand'ufana,
		qand el a pro begut, ab una de Breissana,
	15	q'es bella e gaia e pros et a valor certana;
		et ella volria anz, s'il tot de lieis si vana,
		q'el iagues quatorze anz de la febre cartana
		q'ela·il fos si del tot, cum el volria, humana.
IV		Q'el mon dompna non a c'om deia aver fianssa
	20	que d'amor li fezes mais negun'esperanssa,
		pois eu l'agues comtat sa fera malananssa,
		sa fera escarsetat, sa fera desonranssa,
		ni puois de sos huoils vis sa fera enflada panssa
		ni son fer lechardetz ni sa fera semblanssa.
V	25	Enaissi es valors del tot en lui perduda
		que de pretz si depart e largueza refuda
		e pren escarsetat per amiga e per druda,
		que s'era mout lonc temps en s'amor entenduda ;
		et er a si de lui sa voluntat aguda
	30	que, per amor de lei, corna la recrezuda.
VI		Als crois rics fatz saber, q'ant valor decazuda,
		c'ab ma lenga, q'es plus que rasors esmoluda,
		lor farai derenan guerra fort et aguda.