Sakari, Aimo. Poésies du troubadour Guillem de Saint-Didier. Helsinki: Société Néophilologique, 1956.

Code: 234,006 Auteur: Guilhem de Saint Leidier Genre: Canso Numero: V

Compaignon, ab joi mou mon chan

I	1	Compaignon, ab joi mou mon chan
		Q'ieu ai respieich del joi q’ieu ai
		Qe·m venra grans jois, si Dieu plai,
		Qu'en gentil luoc met mon affan
	5	E, s'ieu tot mi conort temens,
		Jois es molt bels esperamens;
		Per q'ieu no·m vuoil desesperar
		Ni partir del doutz desirar.
II		En aqest desir vauc pensan:
	10	Nuills hom non a fin pretz verai
		Si d'amor non si met em plai
		E cel que plus s'en met en gran
		Per un ben n'a de mals dozens
		E per un joi mil pessamens,
	15	L'autrui tort l'er a plaidejar
		E tener sen son follejar.
III		Fols fo cel c'apellet enan
		Amor aquest mal q'ieu en trai:
		Plang e sospir, plor et esmai,
	20	Iras e dol, perdas e dan;
		Et es enuois e marrimens
		Amors, e fora chausimens
		Si midonz forsses tant d'amar
		Qu'il penses so qe·m fai pensar.
IV	25	Ben pens de cortesia tan
		Que res no·n es, ni eu non sai
		On ja la trob, puois non es lai
		On tuich m'autrejavon lo ban.
		Ai! bella dompn' et avinens,
	30	Cortesia e Chausimens
		Vos fezes tant humiliar
		Qe·m fessetz calque ben-cuidar.
V		Ab sol lo cuich volgr' ieu chantan
		Totz temps musar e tengra·m gai
	35	Et autres gauzis, e·us lo pai
		D'aco qe·us servirai aman;
		E fora sals mos loncs atens,
		Car ses vos m'es totz jois niens.
		Grazitz sui ben — si Dieus mi gar! —
	40	Per bona fe e per doptar.
VI		On plus vos dopti e·us reblan,
		Dobla l'orguoills e pieitz mi fai,
		E gentils cors c'ab Merce·ill vai
		Deuria fraigner son talan.
	45	Mas aissi faill ben aquest sens
		Que gentils etz vos e valens,
		Et on eu plus vos puosc prejar
		Ab Merce, vei l'orguoill doblar.
VII		Doble joi agr' en la cort gran
	50	Al jutgamen, qan lai serai,
		On er saubut tot so de sai,
		S'om disses de la plus prezan
		Que fos tant qant ieu fui vivens
		Qe·m fos de bels acuillimens.
	55	Ben hi agra mes mon chantar
		E·ls huoills si·ls li pogues donar.
VIII		Amics Bertrans, ja trop-amar
		No voillatz ni lonc-esperar.