Sakari, Aimo. Poésies du troubadour Guillem de Saint-Didier. Helsinki: Société Néophilologique, 1956.

Code: 234,009 Auteur: Guilhem de Saint Leidier Genre: Canso Numero: VII

El mon non a neguna creatura

I	1	El mon non a neguna creatura
		Non truep sa par, mas yeu non truep la mia
		Ni ges no sai on ja trobada sia
		Qu'aissi ames per lial fe segura;
	5	Qu'ieu am pus fort selieys que mi guerreya
		No fai nulh drutz lieys qu'en baizan s'autreya;
		Pus mal grat sieu l'am e que·m fai maltraire
		S'ilh m'ames re, pensatz s'ieu l'ames guaire!
II		Ho ieu, sapchatz que no fora mezura,
	10	Pus er l'am tan que m'es mal' enemia;
		E s'ieu l'am sols, est' amors que m'embria?
		Si fai, sivals tan cum bos respiegz dura,
		Aquest respiegz on hom res non espleya
		Non es cauza que hom persegre deya,
	15	Ben o conosc. Si m'en pogues estraire!
		Mas no puesc ges, tan suy lials amaire.
III		Be·m volgra mal si·l fezes forfaitura
		Ni·l agues dig nul erguelh ni falsia,
		Mas quar enans son ric pretz quascun dia
	20	De mon poder e·m platz quan se melhura
		E fas saber qu'a totas senhoreya,
		Quant ieu l'esguar, no fai semblan que·m veya.
		A totz autres es franqu' e de bon aire
		Mas a mi sol no vol belh semblan faire.
IV	25	Quar costum' es que domna sia dura
		E port erguelh selhuy que s'umilia?
		Belha res mal', e co·us falh cortezia
		Ves mi tot sol, qu'autre no s'en rancura!
		Voletz mi mal sol quar mi faitz enveya
	30	E quar vos am mais d'autra res que seya?
		Per aquest »tort» mi podetz los huelhs traire,
		Que ieu ni vos non o podem desfaire.
V		A totz jorns creys e dobl' e s'asegura
		L'amors qu'ie·l port, mas bos fagz desembria,
	35	E meynhs n'aurai, so cug, a la partia
		Qu'al comensar; vey, qu'ades se pejura,
		Que, s'ieu m'irays, de tot en tot sordeya;
		Doncx no sai ieu de qual guiza m'esteya:
		S'ira mi notz e patz no mi val gaire,
	40	Si ·naissi·m vay be suy doncx encantaire.
VI		Amicx Bertrans, vos que es gualiaire
		Es mays amatz qu'ieu que suy fis amaire.