Sakari, Aimo. Poésies du troubadour Guillem de Saint-Didier. Helsinki: Société Néophilologique, 1956.

Code: 234,011 Auteur: Guilhem de Saint Leidier Genre: Canso Numero: VIII

Estat aurai estas doas sazos

I	1	Estat aurai estas doas sazos
		Que non chantei, e faz i mon dampnatge;
		Mas er m'agr' ops bos vers o tals chanssos
		C'azautes lieis cui faz lig' homenatge
	5	Et a·m tengut depuois son pretz auzic
		Que ren no·n ai mas sol lo bon esper
		Que, sivals res si la pogues vezer,
		Ab sol l'esgart mi pogr' ill faire ric.
II		Ab sol l'esgart qe·m mostres amoros
	10	M'agr'il tan faich; per qu'ieu dic gran outratge
		(Que lo sieus cors es tant valens e bos
		Que se·i enten cre que fatz gran follatge):
		»Dompna, s'anc hom per sobramar faillic
		No m'en devetz per orgoillos tener:
	15	Mains n'a el mon ab aqel eus voler,
		C’anc mi ni lor fors las denz non eissic.
III		E pois tant eis vostre pretz cabalos
		Be·i·s taing, dompna, c'aiatz en seignoratge
		Un trobador qe·us chan de pla·n perdos,
	20	Que l’o deignetz tener en agradatge:
		Aquel sui ieu qez anc plus no·us qeric!
		O, s'ieu dic ben, qe·us vengues a plazer,
		O, si que non, que m'o fassatz saber,
		Puois pendetz mi s'ieu ja mais cansson dic.
IV	25	Cansson non dic, dompna, mas endreich vos
		A cui non aus trametr ' autre messatge
		Mas los sospirs q'ieu fatz de genoillos,
		Mas mans jointas, lai on sai vostr' estatge;
		Q'el mon non ai tant mortal enemic
	30	Ab cui trobes o aize o lezer
		Q'ieu vos pogues cubertamen vezer:
		Anc a seignor mieills de cor non servic.»
V		Si per servir fos tant aventuros
		C'Umilitatz fraisses tant son paratge
	35	Q'us doutz ales del sieu gen ris mi fos
		Dolsetamen intratz e mon coratge:
		Si anc nuills hom per ben-amar fenic,
		Eu fenira si·m pogues eschazer,
		Mas per respieich q'ieu pogues mais aver
	40	Visquer' ieu pois ben leu al ver afic.
VI		Un fol afic ant pres ist envejos
		Encontr' Amor, e fant gran vilanatge:
		S'una dompna lauzatz que s'era pros
		Clamaran vos feignedor, per usatge.
	45	Ges no m'en feing, mas depuois anc la vic
		Voill sas onors e son pretz captener,
		Si fatz d'aitan c'autra non a poder
		Qe·m don cel joi qu'anc plus fort m'abellic.
VII		Lo majer jois qu'anc en mon cor sentic
	50	Fon en durmens q'ieu somnhava un ser
		Que·m laissava sas mas nudas tener.
		Murir cugei de joy quan m'esperic.
VIII		Amics Bertrans, digatz Bertran qu'eu dic:
		Trop s'i venguet si·l vengues a plazer
	55	E del sieu tort lais ma merce vezer
		C'uoill no fant ren a cel qui no la vic.