Sakari, Aimo. Poésies du troubadour Guillem de Saint-Didier. Helsinki: Société Néophilologique, 1956.

Code: 234,014 Auteur: Guilhem de Saint Leidier Genre: Canso Numero: XI

Malvaza m'es la moguda

I	1	Malvaza m'es la moguda
		D'estiu, don val meins mos chans,
		Que gaieza m'a tolguda,
		No fes e trics e soans,
	5	E sui·n alqes envilanitz:
		S'ab mi donz no·m val faitz ni digz
		Non sai per qe·m chantes ja mais.
II		Amada l'ai e volguda
		Totz temps per far sos comans
	10	Deis lo temps q'ieu l'aic vehuda,
		C'anc vas lieis non fui camjans;
		Non dic ges q'ieu sia trazitz,
		Mas ben puosc entre·ls escarnitz
		Sezer entro l'ira m'abais.
III	15	Aissi·m vens e m'esvertuda
		L'amors qe·m forss' e·l talans
		Q'ieu non pretz, si·la·m refuda,
		Ses lieis tot lo mon dos gans.
		Del sieu gran tort — si·n er' auzitz —
	20	Li clam merce qe·m fos fenitz
		E penda me s'ieu mais m'irais.
IV		Verais Dieus, don m'es venguda
		Esta voluntatz tant grans
		Que tant ni qant no·is remuda?
	25	E pois alres no·i enans
		Ben gran mestier m'en agr' oblitz
		O qu'estes totz temps endormitz,
		Que sivals en sompjan n'ai mais.
V		Aqesta mi' atenduda
	30	Q'ieu fatz, c'aillor no·m balans,
		Cre q'er a la remasuda
		Del puoig que brugic set ans,
		Puois no·n issic mas la soritz;
		Tant m'es mos afars per faillitz
	35	C'ab promessas ses faitz mi pais.
VI		De cortes luoc mou la razitz
		E·l jois q'es dinz mon cor floritz,
		Don ma bon' esperanssa nais.