Sakari, Aimo. Poésies du troubadour Guillem de Saint-Didier. Helsinki: Société Néophilologique, 1956.

Code: 234,004 Auteur: Guilhem de Saint Leidier Genre: Canso Numero: III

Ben chantera si m'estes ben d'Amor

I	1	Ben chantera si m'estes ben d'Amor,
		Pois aissi chan, desamatz, finamen,
		Que so dizon tuich li bon trobador:
		Ben chanta mieills cui Amors ten gauzen.
	5	Mas cill no·m vol qu'ieu mais desir amar
		Ni non am cellas c'amariant me,
		Q'ieu sui tant fis e trob tant d'avol fe
		Q'ie·n pert Amor e per Amor chantar.
II		Al mieu chantar s'atendan l'amador:
	10	Que jamais us non am trop lialmen,
		Que mais en ant li plus galiador
		Que non ant cill q'en re no·is vant volven.
		Car ieu sui fis e no·m vuolc camiar;
		Viurai ses joi si·l bella no·m rete,
	15	Mas ieu non cug, si de lieis mi recre,
		C'autra del mon mi pogues alegrar.
III		Per l'alegrar d'una doussa sabor
		E pel respieich que sol en lieis m'enten
		S'esgau mas cors en joi et en doussor;
	20	Mas tarda·m trop, per q'ieu m'i vau temen.
		Que, s'ella·m pert, deuria·il enojar
		A las valens, e dirai vos per que:
		Que tuich dirant, si de me lor save,
		Que per lieis fant las autras a doptar.
IV	25	Ses tot doptar ai chausit la gensor
		C'anc dels huoills vis e la plus avinen
		E que mieils creis son bon pretz e s'onor
		Sobre totas c'una no lo·ill defen.
		Nuills hom en lieis ren non pot meillurar,
	30	Mas car vas me es de mala merce;
		Per lieis m'es greu, que mout li descove,
		Qu'eu no volgra re·i pogues hom blasmar.
V		Hom deu blasmar un usatge que cor
		Que fant dompnas que no lor estai gen:
	35	Lonc enqerre — vei c'o fant li plusor
		Qand hom las preg' e lor serv d'avinen.
		Bona dompna sap tost so que deu far
		E·ill folla tart, qan tot lo cors l'en ve,
		Cais qu'ilh es car', e d'aiso non a re
	40	Qe·il cartatz es qan sap cui deu triar.
VI		Si vol triar un drut a desonor
		E puois o tard' un an o plus verten,
		Majer viltatz es, segon sa ricor,
		Que si·n breu temps ames tal qe·il fos gen.
	45	Las trichairitz — e·il fals trichador var —
		Fan un mercat q'a pretz non aperte:
		Lai n'auran un e sai un autr' ab se
		E laissan cel qi pot mais pretz donar.
VIII		Amics Bertrans, aissi m'en vuoill laisar
	50	De far chanssos c'autre jois no m'en ve,
		Car loncs chantars non estec anc trop be
		Ses joi d'amor mas quant sol a joglar.