Bertoni, Giulio. Il serventese di Ricaut Bonomel (1265). "Zeitschrift für romanische Philologie", 34 (1910), pp. 701-707.

Code: 439,001 Auteur: Templier = Ricaut Bonomel Genre: Sirventes Numero: -

Ir' e dolors s'es e mon cor asseza

I	1	Ir' e dolors s'es e mon cor asseza,
		Si qu'a per pauc no m'auci demanes,
		O meta jos la crotz qu'avia preza
		A la honor d'aquel qu'en crotz fo mes;
	5	Car crotz ni lei nom val ni guia
		Contrals fels Turcs, cui Dieus maldia;
		Anz es semblans, en so c'om pot vezer,
		C’al dan de nos los vol dieus mantener.
II		Al primier saut, an Cesaria conqueza
	10	El fort castel d'Alsuf per forza pres.
		Ai! senher Dieus, e qual via an preza
		Tan cavalier, tan sirven, tan borzes
		Que dinz los murs d'Alsuf avia?
		Ailas! lo regne de Suria
	15	A tant perdut que, qui'n vol dir lo ver,
		Per tostemps mais n'er mermatz de poder!
III		Doncs, ben es fols qui a Turcs mou conteza
		Pois Ihesu Crist non lor contrasta res;
		Qu'il an vencut e venzon, de quem peza,
	20	Francs e Tartres, Armenis e Perses,
		E nos venzon sai chascun dia,
		Car Dieus dorm, qui veillar solia,
		E Bafometz obra de son poder
		E fai obrar lo Melicadefer.
IV	25	No m'es semblan que per tan se recreza,
		Anz a jurat e dit tot a pales
		Que ja nuls hom que en Ihesu Crist creza
		Non remandra, s'el pot, en est paes.
		Enans fara bafomaria
	30	Del mostier de Sancta Maria.
		E pus son fils, que'n degra dol aver,
		O vol nil plaz, ben deu a nos plazer.
V		Lo papa fai de perdon gran largueza,
		Contrals Lombartz, a Carl' e als Frances
	35	E sai, ves nos, en mostra gran cobeza,
		Que nostras crotz perdona per tornes.
		E qui vol camjar Romania
		Per la guerra de Lombardia,
		Nostre legatz lor en dara poder,
	40	Qu'il vendon Dieu el perdon per aver.
VI		Senhors Frances, Alexandria
		Nos a piegz fag que Lombardia,
		Que sai nos an Turc sobraz de poder,
		Pres e vencutz e donatz per aver.