Bertoni, Giulio. Un nuovo trovatore italiano: Girado Cavallazzi. "Romania", 43 (1914), pp. 587-593.

Code: 006a,001=175a,001 Auteur: Aicart , Girart Cavallazzi Genre: Tenso (Partimen) Numero: -

Si paradis et infernz sunt aital

		AYCARD DE FOSSAT
I	1	Si paradis et infernz sunt aital,
		Amics Girard, qon tot ior auzem dir,
		In qal d'ams dos voles mais, senz iaucir
		Ni senz dolor, per un mes prendre ostal
	5	Per aprendre d'infer la pena greu?
		En paradis, qom fan l'amic de Deu,
		O inz infern, si qon hom sai apren
		Altres afars demandan e vezen?
		GIRARD CAVALAZ.
II		Aycard, ieu prend lo seior qe mais val;
	10	Q’en paradis voil aprendr' e causir
		Lo ben qe pren zaschuns per Deu servir
		E las ricors de la ioia eternal,
		E qon hom serf de paradis lo feu,
		E qal Deus ten pres de lui plus per seu;
	15	Q’aisi poirai paradis veramen
		Leu conqerer, s'eu non fail eissien.
		AYCARD DE FOSSAT.
III		Girard, mais voil a mon pron vezer mal
		Q’a mon dan ben, per q'en infer desir
		Vezer lo mal q'om i pren per faillir
	20	E las dolors de la pena infernal,
		E qal pena an Saracin e Iudeu
		E paupre e rich, q'aisi sabrai pois leu
		Fugir enfern e servir ben e gen
		Lo ioi maior q'om conquer Deu serven.
		GIRARD.
IV	25	Servisi fat per paor sont venal,
		Aycard, per qe non fan gaire a grazir,
		Q’eu non veg un gen far ne ben merir;
		Mas s'eu serf Deu per sol' amor coral,
		Conqier son grat d'aqel servir e·l meu;
	30	E car trastugh e Latin et Ebreu
		Fol e senat van infer maldisen,
		Voil vezer zo don zascuns a talen.
		AYCARD.
V		Girard, dur est zo qe mou d'autretal;
		Don, s'infer veg, pro n'aurai eu qe·n mir
	35	D'eschivar mal; car plus dopta morir
		Qi ve sa mort qe icels q'est en loc sal;
		E s'aisi est qon aug leger el breu
		O qon veg ping et escrig a la pleu,
		Greu pot nuls iois dar tant d'esbaudimen,
	40	Qon dona infernz, qi·l mira, d'espaven.
		GIRARD.
VI		Aycard, s'en loc paubre trist e mortal,
		On cascuns perd, vos cuiaz enriqir,
		Ben deu l'ostals precios abelir,
		On a toz tens festa pasqa e nadal;
	45	Qe greu trai hom foc de glaz ne de neu,
		Ni ris de plor ni de mal bien, per q'eu
		Voil Deu vezer e sa cort e sa gen,
		E vos vezaz d'infer lo marimen.
		AYCARD.
VII		Amic Girard, tant vos respon en breu:
	50	Q’anc hom no vic la gran ricor de Deu,
		Ni paradis no servic ben ni gen,
		S'inanz non ac d'infer dopt' e' spaven.
		GIRARD.
VIII		Tals dopta infer qi non serf gaire a Deu,
		Amic Aycard, mais de zo non dopt'eu,
	55	Q’hom in infer posca aprenre tan gen
		Servir a Deu, qon qi·l ve de presen.