Radaelli, Anna. Raimon Gaucelm de Béziers. Poesie. Firenze: La Nuova Italia, 1997.

Code: 401,002 Auteur: Raimon Gaucelm de Bezers Genre: Chanson religieuse Numero: I

A Dieu done m'arma de bon'amor

I	1	A Dieu done m’arma de bon’amor
		e de bon cor e de tot bon talan,
		e tot quant ai atressi li coman
		per tal que·m gar de pen’e de dolor,
	5	e que·m perdo so qu’ai fag per folhatge,
		e que·m garde, a la fin, de turmen.
		E no·lh plassa qu’ieu fassa lunh passatge
		ni malvestat contra son mandamen!
II		D’aisso pregui de cor lo mieu Senhor.
	10	Et atressi que non an demembran
		mi ni negus de totz selhs quez estan
		en est segle malvat, galïador.
		E quadau pregue·l de bon coratge,
		qu’El nos perdo le nostre fallimen,
	15	e que·ns meta dedins son bel regnatge
		lo jorn que nos penrem trespassamen.
III		Doncx no·ns prezem, quar petit de valor
		avem cascus en est segle truan,
		quar totz homes d’aquest mon poiriran,
	20	que no·i aura paupre ni ric honor,
		ni ja negus non portara estatge
		que aja fach, ni lunh belh bastimen.
		Per que deuram pauc prezar lo carnatge:
		sol las armas vencson a salvamen.
IV	25	Quar, s’anc fezem per negun temps folhor
		ni lunha re qu’a Lui sïa pezan,
		enqueras tot nos tornara denan,
		segon qu’aug dir a quascun cofessor.
		E no·us pessetz Dieus i honre paratge,
	30	mar selhs qu’auran fag bon captenemen
		vais Elh, e <qu’en> sofriran caitivatge,
		auran s’amor sobre tor majormen.
V		Doncx ben deuram al Rei plen de doussor
		esser humils, quascus ab belh semblan,
	35	quar ses s’amor no valram un aglan
		ans serïam totz ardens en pudor.
		E doncx be fa tot hom gran gazanhatge
		qu’El retenga per amic, e gran sen,
		e pot o far quascus ses son dampnatge,
	40	bos faitz fazen et estan lïalmen.
VI		En la Verge car’ab car piusellatge
		— e quar en lieis non ac corrompemen —
		devem aver totz bon e ferm coratge
		que per s’amor vengam a salvamen.