Radaelli, Anna. Raimon Gaucelm de Béziers. Poesie. Firenze: La Nuova Italia, 1997.

Code: 401,005 Auteur: Raimon Gaucelm de Bezers Genre: Chanson religieuse Numero: II

Dieus m'a dada febre tersana dobla

I	1	Dieus m’a dada febre tersana dobla
		que vol que ieu sïa d’Elh remembratz.
		E pus que·l plai, en la primeira cobla
		li pregarai que·m perdo mos peccatz,
	5	e que·m do la sia bevolensa,
		e que·m garde de far falhensa,
		et a la fi, m’arma de marrimen,
		qu’en negun loc non sufieira turmen.
II		D’aisso prec Dieus senes voluntat dobla.
	10	Qu’ar be·u deg far: tan fort sui turmentatz
		que no mi val tenso, dansa ni cobla,
		qu’a pauc no m’es aquest mon oblidatz.
		Mar Jhezu Crist me fa suffrensa
		per tal qu’aja d’El sovinensa,
	15	e per amor qu’aja remembramen
		si anc lunh temps fi negun fallimen.
III		Quascun jorn vei que aquest segle dobla
		e malvestatz, en tortz et en foldatz,
		que quascus homs vol de Dieu far sa cobla,
	20	e sos esquerns e sos malvais dechatz.
		E non an de re conoissensa
		ni lur fa nulla res temensa
		ans se tenon tot quant es a nïen
		sol que ajon d’aver abastamen.
IV	25	Et es mout folhs qui sa paraula dobla
		encontra Dieu, e mot malazuratz,
		quar selh que·u fa n’auzira mala cobla
		per Jhezu Crist! lo jorn quez er jutjatz,
		quar Dieus li dira ses fallensa:
	30	«Tu iest vengutz en dechazensa
		qu’ades iras el fuec d’ifern arden,
		on ja de mal non auras guerimen!».
V		Bel Senher Dieus, ta fort ma lengua·s dobla
		qu’om no m’enten, tan sui afrevolatz.
	35	Don prec a vos qu’entendatz esta cobla:
		si anc falhi, prec vos, merce m’ajatz!
		Merce nais en vos e·i comensa,
		de merce etz frugz e semensa,
		per que merce vas queri humilmen.
	40	Doncx ajatz la·m, francx reis omnipoten!
VI		Jhezu Crist, vostra bevolensa
		me datz, si·us platz, que tant m’agensa
		que tot quant es als teni a nïen.
		E deg o far, tals ert sertanamen.