Radaelli, Anna. Raimon Gaucelm de Béziers. Poesie. Firenze: La Nuova Italia, 1997.

Code: 401,009 Auteur: Raimon Gaucelm de Bezers Genre: Sirventes Numero: III

Un sirventes, si pogues, volgra far

I	1	Un sirventes, si pogues, volgra far
		quez agrades e plagues a la gen,
		mar no·l sai far, don m’es greu, ben ni gen,
		ni sai belhs digz ni azautz motz triar,
	5	ni sai que s’es trobars ab maiestria,
		per que m’en lais tals horas que·n faria.
		Pero far n’ai un, e non er trop grans,
		aissi quo ssai, qu’aitals es mos talans.
II		Aissi cum sai, en vuelh un acabar
	10	de so qu’om ve per lo mon a prezen:
		pel mon ve hom algun home manen,
		a qui platz mot tolre mais que donar.
		D’aital hom ric, que tolh e non daria,
		tot home bo alunhar s’en deuria,
	15	quar perda es ad hom valen, e dans,
		si·l ve, ni·l au, ni es sos abitans.
III		Doncx ges no deu hom valens abitar
		ab home ric vil, escas e tenen,
		pus que non pot d’el aver jauzimen,
	20	ni·s pot, en re quez elh aja, tornar.
		Mais valria cen tans aver paria
		d’ome paupre, e mais proficharia,
		quar lo paupre seria soplejans
		e faria d’ome totz sos comans.
IV	25	Mar hom non deu avol home blasmar
		quan fa lunh fach croi ni desavinen,
		qu’avol home, si tot fai falhimen,
		fa so que deu, quar d’elh se tanh a far.
		Per que falhis selh que blasma folhia:
	30	qu’aissi quon deu far cortes cortezia
		et homs valens deu far ricx faitz prezans,
		avol hom deu far vils faitz malestans.
V		Tal vetz calliei que degra mielhs parlar
		e tal parliei que aras m’en repen.
	35	Per so o dic: que quascus aja sen
		ans que parle, si·l valria mais callar,
		quar tals vetz ditz hom so que no deuria,
		que s’en repen pueis, si pro li tenia.
		Per que quascus deuri’esser, enans
	40	que res disses, de sos parlars duptans.
VI		Est sirventes ai ieu fach a ma guia,
		aissi cum sai, e si negu·i volia
		re melluirar, fass’o, que no m’er dans
		ans m’er honors e profiegz et enans.